Uburusiya burashinja Ukraine kugaba igitero cya 'drone' zikarohamisha ubwato bwabwo mu nyanja ya Mediterane

Ubwato bw'Uburusiya butwara umwuka kamere utunganyije (liquefied natural gas, LNG) bwarohamye mu nyanja ya Mediterane hagati ya Libya n'ibirwa bya Malta, nyuma yo gukubitwa n'ibiturika hamwe n'umuriro, nkuko abategetsi bashinzwe ibyambu (ibivuko mu Kirundi) bo muri Libya babitangaje.

Uburusiya bwashinje Ukraine kurasa kuri ubwo bwato bwitwa Arctic Metagaz ikoresheje "drone zitajyamo abantu zo mu nyanja" zagabwe kuri ubwo bwato zivuye ku nkombe ya Libya.

Urwego rw'ubutasi rwa Ukraine (SBU) nta cyo rwatangaje kuri icyo kirego ndetse ubuyobozi bushinzwe ibyambu bwa Libya bwavuze ko impamvu yateye uwo muriro itaramenyekana.

Ubutegetsi bwa Libya bwavuze ko ubwo bwato bwari bwikoreye toni hafi 62,000 z'umwuka wa LNG, mbere yuko ibyo biturika, ndetse ko bwarohamye ahantu hari mu ntera ya kilometero 240 mu majyaruguru y'icyambu cya Sirte muri Libya.

Minisiteri yo gutwara abantu n'ibintu y'Uburusiya yavuze ko Abarusiya 30 bari bari mu bwato Arctic Metagaz. Minisitiri w'ubutegetsi bw'igihugu wa Malta, Byron Camilleri, yavuze ko abo bose basanzwe "batekanye kandi bameze neza mu bwato bw'ubutabazi", mu gikorwa cy'ubutabazi cyakozwe n'ingabo za Malta.

Amashusho ya nijoro atagenzuwe yagaragaye, bivugwa ko yerekana ubwo bwato burimo gushya nyuma y'icyo gitero, cyabaye ku wa kabiri.

Serhii Sternenko, uzwi cyane utangaza amakuru ku mbuga za internet (blogger) akaba ari n'umujyanama wa minisitiri w'ingabo wa Ukraine, mu gitondo cyo ku wa gatatu yatangaje amafoto avuga ko agaragaza ubwo bwato muri Mediterane, bufite "umwobo ukomeye mu cyumba cya moteri ndetse ntibushobora gusanwa".

Ntiyatanze amakuru arambuye ku hantu ayo mafoto yavuye ndetse ayo mafoto ntiyagenzuwe mu buryo bwigenga.

Perezida w'Uburusiya Vladimir Putin yabwiye televiziyo y'igihugu ati: "Iki ni igitero cy'iterabwoba."

"Ubu si ubwa mbere duhuye n'ikintu nk'iki."

Minisiteri yo gutwara abantu n'ibintu y'Uburusiya yise icyo gitero "igikorwa cy'iterabwoba mpuzamahanga n'urugomo rwo mu nyanja", ishinja umuryango w'Ubumwe bw'Uburayi kuba umufatanyacyaha muri icyo gikorwa.

Uburusiya bwavuze ko ubwato Arctic Metagaz – bwari buri mu nzira buvuye ku cyambu cya Murmansk cyo mu majyaruguru y'Uburusiya – bwari butwaye umuzigo wujuje ibyangombwa bisabwa hakurikijwe amategeko mpuzamahanga.

Uko bigaragara, ubwo bwato bwari burimo kujya ku cyambu cya Said cyo mu Misiri, ndetse bifatwa ko bwari bumwe mu mato y'Uburusiya akoresha amayeri mu gukwepa ibihano byinshi Uburusiya bwafatiwe n'amahanga.

Minisiteri yo gutwara abantu n'ibintu y'Uburusiya nta gihamya yatanze yo kwemeza ibyo ivuga byuko ubwo bwato bwagabweho igitero na 'drone' za Ukraine zo mu nyanja, nubwo mbere hari hari amakuru ataremejwe y'ibitero bivuye ku nkombe ya Libya.

Urwego rw'ubutasi rwa Ukraine, SBU, rwabwiye ishami rya BBC ritangaza amakuru mu Kinya-Ukraine ko nta cyo ruvuga "ku bintu bijyanye n'ubwato muri Mediterane", nubwo konti yitwa United24 yo ku mbuga nkoranyambaga, ifite aho ihuriye na leta ya Ukraine, yavuze ko izo 'drone' "Rwose. Wenda" zitari mu za Ukraine.

Amakuru yo kuri internet ajyanye n'ubugenzuzi bw'ingedo z'amato yagaragaje ko umunsi umwe mbere y'uwo muriro, ubwo bwato bwaherukaga gutangaza ko bwari burimo buva ku nkombe yo mu majyepfo ashyira uburasirazuba bwa Malta.

Bwari bumaze gukora urugendo rurerure igihe uwo muriro watangazwaga, ndetse byibazwa ko abari batwaye ubwo bwato bazimije uburyo bwo kwimenyekanisha bw'ubwo bwato.

Uburusiya burimo gukoresha amato menshi mu gutwara ibikomoka kuri peteroli hamwe na gaze (gas), mu igerageza ryo gukwepa ibihano bwafatiwe n'amahanga, bigamije kugabanya cyane amafaranga yabaye ingenzi cyane mu gutera inkunga intambara y'Uburusiya muri Ukraine.

Amato yabwo akora mu buryo burimo amayeri, arimo amato ashaje cyane, menshi ntagaragaza neza ba nyirayo cyangwa ubwishingizi.

Nyuma y'igitero gisesuye cy'Uburusiya kuri Ukraine, cyatangiye mu 2022, Ukraine yagabye ibitero byinshi ku mato nk'ayo ikoresheje 'drone' zo mu nyanja.

Ariko, ibitero nk'ibyo hafi ya byose byabereye mu nyanja y'umukara (Black Sea), Uburusiya na Ukraine byombi bikaba bihana imbibi n'iyo nyanja.