Miliyoni z'Abanya-Cuba bari mu mwijima mu gihe ibitoro byarushijeho kubura

Miliyoni z'abantu nta amashanyarazi bafite muri Cuba guhera kuwa wa Gatatu, ibi bikaba ari ibya nyuma mu rukurikirane rw'ibura ry'amashanyarazi ryibasiye icyo kirwa gihanganye n'ibura ry'igitoro ryiyongereye kubera igitutu gituruka muri Amerika.

Bibiri bya gatatu by'icyo kirwa byinjiye mu mwijima nyuma y'uko abategetsi bavuze ko habayeho kwangirika "kutari kwitezwe" ku ruganda rumwe rukomeye rutanga amashanyarazi mu gihugu.

Ikigo cy'igihugu gishinzwe ingufu z'amashanyarazi muri Cuba, UNE, cyatangaje ko iryo bura ry'amashanyarazi rigaragara mu gace kanini kuva mu ntara yo hagati ya Camaguey kugera Pinar del Rio mu burengerazuba, harimo n'umurwa mukuru Havana.

Mu myaka ishize, Cuba yakunze kwibasirwa n'icika ry'amashanyarazi, bitewe n'ibura rikabije ry'igitoro ryarushijeho gukomera kubera ko Amerika yahagaritse ibiva kuri peteroli bituruka ku mufatanyabikorwa wayo w'ingenzi, Venezuela, kuva mu kwezi kwa Kabiri.

Iki gihugu kiyobowe n'abakomunisiti na cyo kirimo guhura n'ikibazo cy'ibura ry'igitoro cy'indege, bigatuma sosiyete nyinshi z'indege zihagarika ingendo zijyayo kandi bikagabanya ubukerarugendo mpuzamahanga. Ku wa Gatatu, Air France yabaye sosiyete ya nyuma ifashe uwo mwanzuro.

Abategetsi bavuze ko ikibazo cy'umuriro wabuze ku wa Gatatu cyatewe n'ikora nabi ry'uruganda rutanga amashanyarazi rwa Antonio Guiteras, ruri hafi kilometero 100 mu burasirazuba bwa Havana.

Ikigo cy'igihugu gishinzwe amashanyarazi cyatangaje ko hari gukorwa ibishoboka byose kugira ngo serivisi zisubire ku murongo.

Iri bura rya mashanyarazi ryabaye kuwa kabiri ryibasiye igice cy'iburengerazuba bwa Cuba mu mezi atatu ashize.

Ibikorwa remezo bishaje byarushijeho kuzamba kubera ibura ry'igitoro, bitera ikibazo cyagize ingaruka ku gutwara abantu n'ibintu bya rusange ndetse no ku ikusanyirizo ry'imyanda.

Cuba ifite ubukungu bushingiye cyane ku gitoro itumizwa mu mahanga mu gutunganya amashanyarazi, yashoboye kwihanganira ibihano bikomeye by'ibihugu by'i Burayi n'Amerika kubera ubufasha bw'abafatanyabikorwa bayo bo mu karere, harimo guverinoma ya Venezuela.

Bikekwa ko Venezuela ku munsi yoherezaga hafi ingunguru 35,000 z'ibiva kuri peteroli muri Cuba zingana hafi na kimwe cya kabiri cy'ibikenewe ku kirwa, mbere y'uko Perezida wayo Nicolas Maduro afatwa n'ingabo za Amerika mu ntangiriro zo mu kwezi Kwambere.

Gucika kwa mashanyarazi kumara amasaha agera kuri 18 ku munsi kwagize ingaruka ku byumba by'ubutabazi by'ibitaro, abarwayi bakorerwa dialysis(iyungururwa ry'amaraso) ndetse n'abongererwa amazi mumubiri.

Amerika na Cuba bimaze igihe bifitanye umubano mubi kuva umuyobozi w'abakomunisiti Fidel Castro ahiritse ubutegetsi bwari bushyigikiwe na Amerika mu 1959. Ibihano by'ubukungu n'ubucuruzi bya Amerika kuri Cuba byatangiye gushyirwa mu bikorwa kuva mu 1960.

Perezida wa Amerika Donald Trump ntiyahishe icyifuzo cye cyo kubona impinduka mu buyobozi bwa Cuba, ndetse yanavuze ko ashobora gushyiraho imisoro ku bicuruzwa byinjira muri Amerika bituruka mu bihugu byose biha igitoro icyo gihugu cyo muri Karayibe.

Air France yatangaje ko ihagaritse ingendo zijya i Havana kuva mu mpera za Werurwe kugeza hagati muri Kamena, bitewe n'ibura ry'igitoro.