Koreya y'Epfo: Perezida Yoon yahagaritswe ku mirimo nyuma yo kweguzwa n'abadepite

Abaturage babarirwa mu bihumbi biraye mu mihanda yo mu murwa mukuru Séoul wa Koreya y'Epfo kubera ibyishimo nyuma yuko abadepite batoye beguza Perezida Yoon Suk Yeol.

Hari n'abigaragambya batishimiye ayo matora yo kweguza Yoon.

Abadepite 204 bemeje umwanzuro wo kweguza Yoon kuri 85 bawurwanyije.

Yoon yamaze guhagarikwa ku mirimo, mu gihe minisitiri w'intebe azakora nka perezida w'agateganyo.

Ubu urukiko rurinda iremezo ry'itegekonshinga rufite igihe cy'amezi atandatu kugira ngo rube rwamaze gufata icyemezo kuri uko kweguzwa.

Ibitangazamakuru byo muri Koreya y'Epfo byatangaje ko urwo rukiko rwitezwe guterana ku wa mbere mu gitondo rukiga ku ngengabihe y'urubanza ku kweguza Yoon.

Urwo rukiko ruzanashyiraho itariki y'iburanisha ryo mu ruhame, nubwo bitaramenyekana niba Yoon azaba ari mu rukiko we ubwe.

Yoon yashoye iki gihugu cyo muri Aziya y'uburasirazuba mu mvururu za politike ubwo yatangazaga amategeko yo mu ntambara ataramaze igihe mu ntangiriro y'uku kwezi.

Han Dong-hoon, umukuru w'ishyaka PPP (People Power Party) rya Yoon, yavuze ko yemeye ibyavuye mu matora yo kuri iki cyumweru kandi ko azirikana uburemere bwabyo.

Mbere yuko abadepite batora beguza Yoon, Han yagerageje kumvisha perezida gutekereza ku "kwegura hakiri kare".

Han yabwiye abanyamakuru bari bari ku nteko ishingamategeko ko ishyaka rya PPP "rizakosora imikorere mibi ndetse ribungabunge itegekonshinga na demokarasi".

Umukuru w'abatavuga rumwe n'ubutegetsi muri Koreya y'Epfo Lee Jae-myung yabwiye abigaragambya imbere y'inteko ishingamategeko ati: "Uyu munsi ni gihamya yuko ari mwe ba nyir'iki gihugu."

Yavuze ko hari "umusozi munini cyane kandi ugoye cyane" ubategereje imbere, yegeka ku "batoni" amakuba ya politike iki gihugu kirimo ubu.

Yasabye iyo mbaga kwishyira hamwe no "kwerekeza ku ntsinzi" hamwe.

Yoon yarokotse amatora yo kumweguza mu mpera y'icyumweru gishize ndetse yakomeje kuguma ku butegetsi nubwo abamusaba kwegura bakomeje kwiyongera.

Yoon n'inshuti ze ubu barimo gukorwaho iperereza ku birego byo kwigomeka, ndetse benshi babujijwe gukorera ingendo hanze.

Hagati aho, Minisitiri w'intebe Han Duck-soo avuga ko azakora uko ashoboye kose kugira ayobore leta nka Perezida w'agateganyo, mu gihe Minisitiri w'ingabo w'agateganyo Kim Seon-ho yasabye igisirikare gukomeza kuba cyiteguye.