FC Barcelona yemeye kwamamaza DR Congo kuri miliyoni 46$

Leta ya DR Congo yemeye kwishyura FC Barcelona yo muri Espagne miliyoni 46$ yo kwamamaza iki gihugu hagamijwe guteza imbere ubukerarugendo bwacyo, nk'uko biri mu masezerano ibiro ntaramakuru Reuters bivuga ko byabonye.

Ayo masezerano yo ku itariki 29 z'ukwezi gushize kwa Kamena(6) avuga ko ikirango (logo) kigaragaza iki gihugu nka "umutima wa Afurika" kizaboneka inyuma ku myenda y'imyitozo y'amakipe y'abagabo n'abagore ya Barcelona.

Iyo 'logo' kandi izaboneka mu kwamamaza iyi kipe, muri magazine yayo no muri raporo y'umwaka y'iyi kipe, nk'uko ayo masezerano abivuga.

DR Congo izishyura hagati ya miliyoni 11$ na miliyoni 13$ ku mwaka mu gihe cy'imyaka ine y'aya masezerano.

Amakipe ya AS Monaco yo mu Bufaransa na AC Milan yo mu Butaliyani, na yo mu kwezi gushize yatangaje, atavuze uko yishyuwe, amasezerano yagiranye na DR Congo.

Ku wa gatatu, Moïse Katumbi ukuriye ishyaka Ensemble Pour La Republique ritavugarumwe n'ubutegetsi, yandikiye ibaruwa Perezi Félix Tshisekedi avuga ko ayo masezerano ari "igitutsi ku kababaro k'abaturage ba Congo".

Mu ibaruwa ye, Katumbi usanzwe ufite ikipe ya TP Mazembe, yagize ati: "Barasohora miliyoni z'amadorari yo gufasha amakipe akize cyane y'Iburayi mu gihebananiwe gutanga 600 000$ ngo turangize shampiyona yacu y'umupira w'amaguru. Ni ngombwa kwibutsa ko shampiyona yacu yahagaze igeze hagati kubera kubura amafaranga?..."

Yongeraho ati: "Mu gihe bimeze gutyo, barasinya amasezerano n'amakipe yo hanze afite abakinnyi b'abasimbura bahembwa neza kurusha minisitiri wa Congo".

Didier Budimbu, minisitiri wa DR Congo w'imikino yabwiye Reuters ko amasezerano na AS Monaco ari miliyoni 1.8$ ku mwaka. Gusa ntiyatangaje azishyurwa AC Milan.

Umwe mu bagize guverinoma avuga ko amasezerano na AC Milan angana na miliyoni 16$ ku mwaka, nk'uko Reuters ibivuga.

Mu gutangaza amasezerano na AC Milan tariki 20 Kamena(6), minisitiri Didier M'Pambia w'ubukerarugendo muri DRC yavuze ko ari uburyo bwa leta bwo "gusubiza DRC ku ruhando mpuzamahanga nk'igihugu gikomeye ku mugabane wa Afurika" mu guteza imbere ubukerarugendo no kwerekana amahirwe gifite mu ishoramari.

Muri Gashyantare(2) Thèrése Kayikwamba Wagner minisitiri w'ububanyi n'amahanga wa DRC yasabye amakipe ya Arsenal, Bayern Munich na Paris St Germain guhagarika amasezerano afitanye na leta y'u Rwanda yo kwamamaza "Visit Rwanda".

Byari nyuma y'uko umutwe wa M23 ufashe imijyi yaGoma na Bukavu mu burasirazuba bwa DR Congo, Kinshasa ikavuga ko uwo mutwe ufashwa n'u Rwanda gucukura no gucuruza amabuye y'agaciro acuruzwa n'u Rwanda.

U Rwanda ruhakana ibyo birego bya DR Congo.

Ibinyamakuru by'imikino muri Espagne bivuga ko Barcelona ikeneye aya mafaranga ya DR Congo kugira ngo ayifashe kuzana abakinnyi bashya bazakina shampiyona itaha, no gushyira mu ngiro itegeko rya La Liga rizwi nka 1:1 ritegeka amakipe gukoresha ingengo y'imari ingana n'ibyo yinjije.