Muri uku kwezi abanyakenya 89 bari ku rugamba muri Ukraine barwanira Uburusiya – Ubutasi bwa Kenya

    • Umwanditsi, Wycliffe Muia
    • Igikorwa, Nairobi
  • Igihe co gusoma: iminota 2

Urwego rushinzwe ubutasi rwa Kenya rwatangaje ko abaturage b'iki gihugu bagera ku 1,000 batwawe kurwanira Uburusiya bifitwemo uruhare na bamwe mu bategetsi babi bakorana n'amatsinda y'abacuruza abantu.

Raporo y'urwo rwego rw'ubutasi yashyikirijwe Inteko Ishingamategeko ya Kenya ku wa gatatu ivuga ko abanyakenya nibura 89 bari ku rugamba mu ntambara y'Uburusiya na Ukraine muri uku kwezi kwa Gashyantare(2).

Umunyakenya umwe yarapfuye, abandi babariwa muri za mirongo bagarutse iwabo barakomeretse cyangwa barahungabanye.

Leta ya Kenya, mbere yari yavuze ko abajyanywe ku rwanira Uburusiya bagera kuri 200, kandi yasabye Moscow guhagarika kuvana abarwanyi muri icyo gihugu cya Afurika y'iburasirazuba.

Mu ntangiriro z'uku kwezi, ikigo INPACT cyasohoye raporo ivuga ko abarwanyi barenga 1,400 bavuye mu bihugu 35 bya Afurika hagati ya 2023 na 2025, kandi ko 316 muri bo baguye ku rugamba. Muri abo bapfuye harimo Abarundi batandatu.

Kimani Ichung'wah umwe mu badepite mu nteko ya Kenya avuga kuri iyo raporo, yavuze ko "bibabaje cyane" kuba hari "abategetsi babi bamwe" bakorana n'amatsinda y'abakora ubucuruzi bw'abantu batwara abantu mu ntambara.

Uru rwego rw'ubutasi ruvuga ko ibyo bikorwa byo gutwara abanyakenya kurwanira Uburusiya bigirwamo uruhare n'abakozi bamwe bo mu rwego rushinzwe abinjira n'abasohoka, urwego rushinzwe gukurikirana ibyaha, n'urwego rushinzwe umurimo mu gihugu.

Depite Icung'wah avuga ko bamwe mu bategetsi b'izo nzego bakorana n'abakozi bo muri Ambasade y'Uburusiya i Nairobi na ambasade ya Kenya i Moscow mu gufasha abajyanwa ku rugamba kubona visa y'Uburusiya.

Skip Ibisomwa cane and continue reading
Ibisomwa cane

End of Ibisomwa cane

BBC yasabye ambasade y'Uburusiya kugira icyo ibivugaho. Gusa mbere Uburusiya bwahakanye uruhare mu kuvana abarwanyi muri Kenya.

Iyi raporo y'ubutasi bwa Kenya ivuga ko abantu bari hagati y'imyaka 20 na 50 barimo abahoze ari abasirikare, abahoze ari abapolisi n'abashomeri badafite akazi ari bo bashakishwa cyane n'abatwara abarwanyi.

Abo bizezwa umushahara w'amashilingi ya Kenya 350,000 ( hafi miliyoni 4 Frw) ku kwezi, n'uduhimbazamusyi turi hagati ya 900,000 Ksh na miliyoni 1.2 Ksh.

Gusa ngo iyo bahageze, benshi bavuga ibyo ntabyo babona uko babibwiwe ahubwo nyuma y'amahugurwa y'igihe gito bahita boherezwa imbere ku rugamba muri Ukraine.

Icung'wah ati: "Bababwira ko bagiye kuba abarinzi…ariko bahagera bagatozwa ibyumweru bitatu…bakabaha imbunda urebye ngo bajya kugwa ku rugamba".

Kugeza ubu, abanyakenya 27 ni bo bagamaze kugarurwa iwabo aho barimo kwitabwaho kubera ihungabana bakuye ku rugamba.