Ethiopia: Abiy Ahmed yiyemeje gutera ibiti miliyari esheshatu muri iki gihe cy'imvura

Minisitiri w'intebe wa Ethiopia yihaye intego yo gutera ibiti miliyari esheshatu muri iki gihe cy'imvura.

Abiy Ahmed yavuze ko gutema amashyamba ari ikibazo gikomeye mu gihugu.

Mu mwaka wa 2019 yatangije igikorwa yise 'Green Legacy', cyangwa umurage w'ibimera, ugenekereje mu Kinyarwanda, mu rwego rwo guhangana n'ingaruka z'ihindagurika ry'ikirere.

Umwanditsi mukuru wa BBC kuri Afurika Will Ross avuga ko ku bijyanye no kwiha intego, Minisitiri Abiy ashoboye kwiha intego zisa nko kwigerezaho ku bijyanye no gutera ibiti.

Abiy avuga ko iki gihugu kiri hafi kugera ku ntego yashyizeho mu mwaka wa 2019 yo gutera ingemwe miliyari 20 z'ibiti mu gihe kitarenze imyaka ine.

Ubu yasabye abantu bo muri Afurika na bo gukurikiza urwo rugero rwe, bagakora icyo yise "gutuma umugabane uba icyatsi kibisi".

Bamwe mu banenga Abiy babona ibi nk'igikorwa cyo kuzahura isura ye mu mahanga, ariko we avuga ko hacyenewe kugabanywa imyuka ihumanya ikirere, kongera igipimo cy'imvura mu turere turangwamo izuba ryinshi, no gufasha mu kurinda imyuzure n'inkangu.

Avuga ko iki gikorwa cyafashije mu kwigisha abaturage, gituma habaho kugabanuka gukomeye kw'itemwa ry'amashyamba mu myaka micyeya ishize.