Trump yakangishije igikorwa cya gisirikare muri Nigeria kubera 'ubwicanyi bukorerwa abakirisitu'

Perezida w'Amerika Donald Trump yakangishije ko ashobora gukora igikorwa cya gisirikare muri Nigeria, ashinja leta y'icyo gihugu cyo muri Afurika y'uburengerazuba kwemera ko abakirisitu bicwa.

Ibi bitumye imvugo y'Amerika ifata indi ntera iteje akaga, ku bijyanye n'ibivugwa ko hari ubwicanyi bwo mu kivunge bukorerwa abakirisitu bukozwe n'intagondwa zigendera ku mahame akaze ziyitirira Isilamu. Bishobora kugira ingaruka ku mubano w'ibihugu byombi.

Leta ya Nigeria yahakanye ibivugwa ko abakirisitu barimo kwicwa mu buryo butandukanye (burenze) n'ingano yabo, bishwe n'intangondwa ziyitirira Isilamu, mu majyaruguru y'iki gihugu yiganjemo abayisilamu.

Mu butumwa yatangaje ku wa gatandatu ku rubuga nkoranyamabaga rwe rwitwa Truth Social, Trump yavuze ko Amerika ishobora "kugenda n'imbaraga nyinshi yarubiye ikavanaho burundu" abo yise abaterabwoba ba kisilamu barimo gukora amarorerwa.

Yanakangishije guhagarika imfashanyo yose igenewe Nigeria. Yagize ati: "Ubu ntegetse Minisiteri yacu y'Intambara kwitegura igikorwa gishobora kubaho.

"Nidutera, bizaba byihuse, birimo ubugome, kandi biryoshye, nkuko abagome b'abaterabwoba batera Abakirisitu DUKUNDA CYANE!" Trump yaburiye leta ya Nigeria ko byaba byiza hari icyo ibikozeho cyihuse.

Ku wa gatanu, Trump yatangaje ko yagennye Nigeria nk'"Igihugu giteje Inkeke Yihariye". Ku wa gatandatu, leta ya Nigeria yasubije ihakana ko abakirisitu barimo kwicwa.

Ubwo Perezida wa Nigeria Bola Tinubu yasubizaga kuri icyo cyiciro Trump yashyizemo Nigeria, yasobanuye ko Nigeria irimo guhangana n'ikibazo cy'umutekano mucye, kandi ko abantu bo mu madini yombi barimo gukorerwa urugomo bitewe n'uwo mutekano mucye. Yavuze ko itegekonshinga rya Nigeria ryemera ubwisanzure bw'amadini.

Leta ya Nigeria yagize iti: "Dukomeje gushishikara mu muhate wacu wo guhashya urugomo rw'abahezanguni rukongezwa n'abafite inyungu zihariye bafashije mu guteza iyangirika rikomeye gutya no gucikamo ibice mu bihugu byo mu masangano y'akarere k'Afurika y'Uburengerazuba n'akarere ka Sahel."

Perezida Tinubu yavuze ko Amerika ari inshuti ya hafi ya Nigeria, ndetse ko leta ye izakomeza kwibanda cyane no kwiyemeza ishimitse gukorana n'abafatanyabikorwa bemera amahoro nyakuri, umutekano, ubwisanzure na demokarasi.

Kwita igihugu ko giteje "inkeke yihariye", ni imwe mu nyito zikaze cyane Amerika ishobora gutanga, iteganywa n'amategeko y'Amerika. Ituma hashobora gufatwa ibihano cyangwa izindi ngamba zo mu rwego rwa dipolomasi ku bihugu bishinjwa ihonyorwa rikomeye ry'ubwisanzure bw'amadini.

Nigeria imaze igihe kirekire ibamo ubushyamirane bushingiye ku madini no ku moko, by'umwihariko mu majyaruguru ashyira uburasirazuba bw'icyo gihugu, aho imitwe y'intagondwa ziyitirira Isilamu, nka Boko Haram n'ishami ry'Afurika y'uburengerazuba ry'umutwe wiyita Leta ya Kisilamu, yakomeje kugaba ibitero byicirwamo abantu, mu gihe cy'imyaka irenga 10 ishize.

Muri leta ya Plateau na leta ya Benue ziri rwagati muri Nigeria, abantu babarirwa mu magana barishwe, byitirirwa ubushyamirane buri hagati y'abahinzi n'aborozi.

Imiryango iharanira uburenganzira bwa muntu ivuga ko abakirisitu n'abayisilamu bakorewe urugomo, nubwo imiryango imwe ishinja abategetsi kunanirwa kurinda abaturage ba nyamucye.

Mu Kuboza (12) kw'umwaka wa 2020, ni bwo minisiteri y'ububanyi n'amahanga y'Amerika yaherukaga kugena Nigeria nk'"igihugu giteje inkeke yihariye" kuko amakuru yavugaga ko gikora cyangwa cyihanganira ihonyorwa rikomeye ry'ubwisanzure bw'amadini, nkuko bukubiye mu itegeko ry'Amerika rigenga ubwisanzure mpuzamahanga bw'amadini.