UK: Urwego rucunga umupaka ruvuga ko abimukira 254 bambutse Channel ku cyumweru

Urwego rw'umutekano rucunga umupaka ruvuga ko rwatahuye amatsinda menshi y'abimukira bambutse umuyoboro uzwi nka Channel (la Manche) binjira mu Bwongereza.

Minisiteri y'ingabo z'Ubwongereza yavuze ko ku cyumweru yatahuye amato (ubwato) arindwi atwaye abimukira 254. Ariko yavuze ko itemeza ko hari umwimukira n'umwe wahageze "mu buryo bwe bwite" mu bwato buto.

Minisiteri y'ingabo yavuze ko leta y'Ubwongereza irimo guhangana n'ikibazo cy'abimukira "ifatira ingamba abakora magendu y'abantu".

Byemezwa ko iyi ari inshuro ya mbere habayeho kwambuka uwo muyoboro mu minsi 11 ishize.

Bamwe mu babikurikiranira hafi bumvikanishije ko kuba bishoboka ko abasaba ubuhungiro bashobora koherezwa mu Rwanda, byatangiye guca intege abasaba ubuhungiro - ariko nanone mu minsi 11 ishize ikirere cyaranzwemo umuyaga mwinshi muri ako gace ka Channel, ikintu gishobora kuba cyarabigizemo uruhare runini.

Mu kwezi gushize kwa kane, Minisitiri w'intebe w'Ubwongereza Boris Johnson yatangaje ko minisiteri y'ingabo z'iki gihugu yafashe mu nshingano zayo ubuyobozi bw'igikorwa cyo guhangana no kwambuka mu mato matoya.

Ivuga kuri uko gutahurwa gushya kw'abambuka ko ku cyumweru, minisiteri y'ingabo z'Ubwongereza yavuze ko uko kwiyongera mu kwambuka "guteje ibyago" kutakwihanganirwa.

Umuvugizi wayo yagize ati: "Ntabwo ari uguhonyora gusa ku mugaragaro amategeko yacu y'abimukira ahubwo kunafite ingaruka ku muturage w'Ubwongereza utanga umusoro, gushyira ubuzima mu kaga ndetse n'ubushobozi bwacu bwo gufasha impunzi ziza mu Bwongereza zinyuze mu nzira zirimo umutekano kandi zikurikije amategeko".

Icyo cyemezo cyakurikiye ukwiyongera gukomeye kw'umubare w'amato matoya yambuka, abantu barenga 6,000 bakaba ari bo bamaze kwambuka kugeza ubu muri uyu mwaka.

Imibare mishya ya minisiteri y'ubutegetsi bw'igihugu mu Bwongereza igaragaza ko abantu 28,526 bambutse mu mwaka wa 2021, bavuye ku bantu 8,466 mu mwaka wa 2020.

Kugerageza guhangana n'icyo kibazo mu gukorana n'Ubufaransa n'ibindi bihugu by'i Burayi, kugeza ubu ntibyatanze umusaruro. Minisiteri y'ubutegetsi bw'igihugu y'Ubwongereza na leta y'Ubufaransa biri mu makimbirane ku buryo bwiza bwo guhangana n'aya makuba.

Mu mwaka ushize wa 2021, Minisitiri w'ubutegetsi bw'igihugu w'Ubwongereza Priti Patel yaburiye ko kunanirwa kubonera umuti icyo kibazo i Burayi byari birimo gushyira ubuzima mu kaga.

Itangazo rye ryakurikiye impfu z'abantu 27, nyuma yuko ubwato bwabo burohamye barimo kuva mu Bufaransa berekeza mu Bwongereza - byibazwa ko ari bwo bwa mbere, kuva amakuru yatangira gukusanywa mu mwaka wa 2014, abantu benshi babuze ubuzima icyarimwe barimo kwambuka Channel.

Gahunda yo koherezwa mu Rwanda

Muri uko kwezi gushize kwa kane ubwo ubuyobozi bw'iki gikorwa yabushingaga minisiteri y'ingabo, leta y'Ubwongereza yahishuye gahunda yo kohereza mu Rwanda bamwe mu basaba ubuhungiro bambuka Channel.

Bijyanye n'iyo gahunda, abantu bafatwa nk'abinjiye mu Bwongereza mu buryo bunyuranyije n'amategeko kuva ku itariki ya 1 y'ukwezi kwa mbere bashobora kujyanwa n'indege mu Rwanda, aho bazemererwa gusaba uburenganzira bwo kuba mu Rwanda.

Leta y'Ubwongereza yavuze ko iyo gahunda yaca intege cyane abakora magendu y'abantu ndetse ikabuza ko abantu bapfira mu nzira zirimo ibyago zerekeza mu Bwongereza.

Ariko amashyaka atavuga rumwe n'ubutegetsi, imiryango ifasha hamwe na Kiliziya y'Ubwongereza, banenze iyo gahunda bavuga ko ari iy'ubugome.

Imiryango ifasha n'ikora ubukangurambaga irenga 160, yanditse ibaruwa ifunguye ishishikariza Minisitiri w'intebe na Madamu Patel gukuraho iyo gahunda y'"ubugome buteye isoni".

Musenyeri mukuru w'abanglikani Justin Welby yakoresheje inyigisho ye yo ku cyumweru cya Pasika, avuga ku "bibazo bikomeye byo gushyira mu gaciro" avuga ko biri muri iyo gahunda, anavuga ko "itandukanye na kamere y'Imana".

Minisitiri w'ubutegetsi bw'igihugu Priti Patel yasubije abanenga iyo gahunda ya leta yo kohereza mu Rwanda abasaba ubuhungiro, avuga ko bananiwe gutanga ibisubizo kuri icyo kibazo.

Hagati aho, hanibajijwe ku kiguzi (igiciro) gishobora gutangwa kuri iyo gahunda, no ku musaruro yatanga.

Theresa May wahoze ari Minisitiri w'intebe w'Ubwongereza, wigeze no kuba Minisitiri w'ubutegetsi bw'igihugu, yavuze ko adashyigikiye iyo gahunda kubera impungenge ku kumenya niba yubahirije ibisabwa "mu mategeko, mu mikorere no mu gutanga umusaruro".

Madamu Patel yashyigikiye iyo gahunda avuga ko ari ngombwa mu rwego rwo "kumena [gusenya] ubucuruzi" bukorwa n'abacuruza abantu, gukumira ibura ry'ubuzima no gutuma habaho "uburinzi ku banyantege nkeya ba nyabo".