South Korea: Babiri bafunzwe bacyekwaho kumena amabanga ya gisirikare bayaha iya ruguru

Polisi ya Koreya y'epfo ivuga ko yataye muri yombi abantu babiri bacyekwaho kumena amabanga ya gisirikare bayaha umuntu byemezwa ko ari maneko wa Koreya ya ruguru.

Polisi ivuga ko umuyobozi mukuru w'ibyo guhererekanya amafaranga yo mu ikoranabuhanga - azwi nka cryptocurrency - hamwe n'umusirikare bamennye amabanga ajyanye n'amakuru yo kwinjira muri mudasobwa (login details) y'ubuyobozi bukuru bw'ingabo za Koreya y'epfo.

Bashinjwa kuba ibyo barabiherewe amafaranga menshi.

Koreya ya ruguru na Koreya y'epfo bifitanye umubano mubi kuva byarwana mu ntambara yo guhera mu mwaka wa 1950 kugeza mu mwaka wa 1953.

Polisi yagize iti: "Ubu ni ubwa mbere aho umusirikare ukiri mu kazi hamwe n'umusivile bakorera ku mategeko ya maneko wa Koreya ya ruguru bakoranye rwihishwa kandi kuneka amabanga ya gisirikare bigatahurwa".

Polisi ya Koreya y'epfo ivuga ko uwo musirikare yakoresheje kamera (camera) yo ku isaha ndetse n'akuma ka USB mu kugeza uwo maneko kuri ayo makuru hagati y'ukwezi kwa mbere n'ukwezi kwa gatatu.

Abo bagabo bombi batawe muri yombi muri uku kwezi kwa kane. Aho uwo ucyekwa kuba ari maneko wa Koreya ya ruguru aherereye ndetse n'umwirondoro we ntibiramenyekana.

Ku wa kane ni bwo abashinjacyaha na polisi ba Koreya y'epfo batangaje ko ukuriye kompanyi y'amafaranga yo mu ikoranabuhanga, watangajwe gusa ko yitwa Lee, n'umusirikare, watangajwe gusa nka Kapiteni B, batawe muri yombi.

Bombi baregwa kurenga ku itegeko ry'umutekano w'igihugu rya Koreya y'epfo.

Ntibizwi andi makuru ashobora kuba yaragezweho.

Uwo musirikare yahembwe miliyoni 48 z'ama won ya Koreya y'epfo (angana na miliyoni 38 mu mafaranga y'u Rwanda) yo mu gaciro ka bitcoin ku ruhare rwe muri icyo gikorwa, mu gihe Lee yahembwe miliyoni 700 z'ama won (miliyoni 558 z'amafaranga y'u Rwanda) muri bitcoin, nkuko abashinjacyaha babivuze.

Polisi yavuze ko mu kwezi kwa kabiri ari bwo yahawe amakuru kuri icyo gikorwa. Abategetsi bataye muri yombi Lee ku itariki ya 2 y'uku kwezi kwa kane, banata muri yombi uwo musirikare ku itariki ya 15 y'uku kwezi.

Abakuru ba polisi bavuze ko ucyekwa kuba inyuma y'icyo gikorwa bicyekwa ko ari Umunya-Koreya ya ruguru, hagendewe ku byatangajwe n'abo babiri bacyekwa bafashwe ndetse no ku biganiro bagiranye ku rubuga rwa Telegram.

Polisi yongeyeho ko uko kumena amabanga kwaburijwemo mu guta muri yombi Lee n'uwo musirikare.