Perezida Biden ashinja Russia gukora 'jenoside' muri Ukraine
Ahavuye isanamu, Getty Images
Perezida w'Amerika Joe Biden yashinje "umunyagitugu" Vladimir Putin gukora jenoside muri Ukraine.
Mu ijambo yavugiye muri leta ya Iowa ku bijyanye n'ibiciro by'ibitoro, mu mvugo ye Biden yagejeje aharenze ah'undi muntu uwo ari we wese wo mu butegetsi bwe yari yarageze mbere yaho mu kuvuga ku bwicanyi bwakorewe abasivile muri Ukraine.
Abategetsi bo muri Amerika bari barashinje Uburusiya gukora ibyaha byo mu ntambara, ariko kugeza ku munsi wo ku wa kabiri nta n'umwe muri bo wari warigeze yita ubwo bwicanyi "jenoside".
Mbere, Uburusiya bwahakanye ibirego by'ibyaha byo mu ntambara, buvuga ko ari "amakuru y'ibinyoma".
Nyuma yaho, Biden yavuze ko abanyamategeko ari bo bazemeza niba jenoside yarakozwe.
Nyuma y'ijambo rye, yabwiye abanyamakuru ati: "Rwose kuri jyewe bisa nkaho ari jenoside".
Perezida wa Ukraine Volodymyr Zelensky yavuze ko ubwicanyi bwakorewe abaturage b'abasivile mu mujyi wa Bucha uri hafi y'umurwa mukuru Kyiv - bwatumye mu mahanga henshi haba gushinja Uburusiya ibyaha byo mu ntambara - ari "jenoside ya nyayo".
Mbere yaho ku wa kabiri, Perezida Zelensky yavuze ko izindi mva zahambwemo abantu mu kivunge zirimo gutahurwa "hafi buri munsi" mu turere mbere twari twarigaruriwe n'Uburusiya.
