Intambara muri Ukraine: Kuki Russia irimo gutakaza ibifaru byinshi?

Byibazwa ko Uburusiya bumaze gutakaza ibifaru bibarirwa mu magana muri iki gihe cy'amezi atageze kuri abiri bumaze buteye Ukraine.

Inzobere mu bya gisirikare zivuga ko uko gutakaza biterwa n'intwaro zigezweho zirasa ibifaru ibihugu byo mu burengerazuba (Uburayi n'Amerika) byahaye Ukraine, n'uburyo bubi Uburusiya bwakoreshejemo ibifaru byabwo.

Uburusiya bumaze gutakaza ibifaru ku kihe kigero?

Ingabo za Ukraine zivuga ko Uburusiya bumaze gutakaza ibifaru birenga 680.

Urubuga Oryx - rukusanya amakuru ya gisirikare n'ubutasi rubara ibyo Uburusiya butakaza mu rwego rwa gisirikare muri Ukraine rushingiye ku mafoto yoherezwa avuye ku rugamba - ruvuga ko Uburusiya bumaze gutakaza ibifaru birenga 460 n'izindi modoka z'intambara zirenga 2,000.

Nkuko bitangazwa n'ibigo by'ubushakashatsi Rand Corporation na International Institute for Strategic Studies (IISS), Uburusiya bwari bufite ibifaru binini bigera hafi ku 2,700 byose hamwe mu ntangiriro y'iyi ntambara.

Intwaro zirasa ibifaru zatanze umusaruro ku kihe kigero?

Mu ntangiriro y'iyi ntambara, Amerika yahaye Ukraine ibisasu bya misile 2,000 byo mu bwoko bwa Javelin birasa ibifaru, ndetse kuva icyo gihe imaze kuyoherereza ibindi bitari munsi ya 2,000.

Ibisasu bya Javelin bishobora kuraswa kuburyo igisasu gishwanyukira hejuru ku gifaru, aho igifaru kiba kidakomeye cyane, nkuko bivugwa n'uruganda Lockheed Martin rukora ibyo bisasu.

Ibifaru byinshi by'Uburusiya biriho igice cyo kuburizamo ikibirashweho, kigabanya ukwangiza gutewe n'ibisasu bya misile.

Ariko, ibisasu bya Javelin biriho imitwe ibiri njya rugamba. Umwe ukuraho icyo gikingirizo kigabanya kwangizwa n'ibisasu, mu gihe icya kabiri cyinjira imbere mu gifaru.

Ubwongereza na bwo bwoherereje Ukraine ibisasu bitari munsi ya 3,600 bigezweho byorohereye birasa ibifaru, ibisasu bizwi nka 'Next generation Light Anti-tank Weapon' (NLAW).

Ibi bisasu na byo byakozwe mu buryo butuma biturika mu gihe binyuze hejuru y'igice cyo hejuru cy'ibifaru - igice cyo hejuru muri rusange kiba kiri ahagaragara.

Nick Reynolds, umushakashatsi akaba n'umusesenguzi ku ntambara yo ku butaka wo mu kigo cy'ubushakashatsi ku bya gisirikare cyo mu Bwongereza cya Royal United Services Institute (RUSI), agira ati: "Javelin na NLAW zifite imbaraga nyinshi cyane".

"Iyo hatabaho iyi mfashanyo yica, uko ibintu bimeze muri Ukraine byajyaga kuba bitandukanye cyane".

Amerika irimo guha Ukraine indege nto 100 zitarimo umupilote - zizwi nka 'drones' - zirasa ibifaru, zo mu bwoko bwa 'Switchblade'.

Izi 'drones' zizwi nka "kamikaze" (iz'ubwiyahuzi), zishobora kujya hejuru y'icyo zoherejweho kurasa kiri mu birometero uvuye aho uzikoresha ari, zikamanukira hejuru ku gifaru, zikagiturikiraho zikoresheje umutwe w'igisasu uziriho.

Ni ku kihe kigero ibi byakwegekwa ku mayeri y'urugamba y'Uburusiya?

Muri iki gihe, igisirikare cy'Uburusiya gikorera mu mitwe y'amayeri y'urugamba ishamikiye kuri za batayo, izwi nka 'Battalion Tactical Groups' (BTGs), iyi ikaba ari imitwe yihagije yo kurwana aho buri mutwe uba urimo ibifaru, abasirikare barwanira ku butaka ndetse n'imbunda za rutura.

Imiterere ya nyayo y'iyi mitwe ishobora guhindagurika, ariko muri rusange iba irimo umubare munini w'imodoka z'intambara ariko muri rusange ikagira umubare muto w'abasirikare barwanira ku butaka.

Izindi nkuru wasoma ku ntambara muri Ukraine:

Phillips O'Brien, wigisha amasomo yo gupanga urugamba kuri Kaminuza ya St Andrews muri Scotland (Écosse), agira ati: "Muri rusange Uburusiya bufite abasirikare bacye bo kwiyambaza".

"Rero BTGs [ya mitwe yo muri za batayo] ni uburyo bwo gushyiraho umutwe wo kurwana ufite imbaraga nyinshi.

Ati: "Bigenewe kugaba igitero mu buryo bwihuse bikagira n'ubushobozi bwinshi bwo gusenya. Ariko, bifite uburinzi bucye cyane mu bijyanye n'abasirikare barwanira ku butaka bo kubiherekeza no kwihorera [kwihimura] mu gihe umurongo w'ibifaru ugabweho igitero".

"Ibyo bituma igisirikare cy'Uburusiya kiba nk'umuteramakofe ufite ingumi [ikofe] ya nyayo y'iburyo akagira n'ijigo rikozwe mu kirahure [ryoroshye]".

Profeseri O'Brien avuga ko kuba Uburusiya budakora amarondo ahagije mu kirere bituma abasirikare ba Ukraine barorohewe no kwinjira mu birindiro no gutega imitego imirongo y'ibifaru by'Uburusiya.

Ati: "Mu ntangiriro y'intambara Uburusiya ntibwagize ubudahangarwa mu kirere".

"Rero ntibashobora kugenzura ikirere, ngo batahure ingendo z'igisirikare cya Ukraine.

"Ibyo bivuze ko abasirikare ba Ukraine bashoboye kwinjira ahantu heza ho kurasira h'imitego, ndetse bashoboye kwangiza byinshi muri ubu buryo".

Ni ibingana gute muri ibi byatewe n'ubushobozi bucye bw'Uburusiya?

Nkuko bigaragazwa n'imibare y'urubuga Oryx, kimwe cya kabiri cy'ibifaru Uburusiya bwatakaje ntibyashenywe cyangwa ngo byangizwe n'umwanzi, ahubwo byarafashwe cyangwa bisigwa aho ngaho.

Inzobere zivuga ko ibi byatewe no kunanirwa kw'ibikoresho, ndetse n'ubushobozi bucye bw'abasirikare b'Uburusiya.

Profeseri O'Brien ati: "Wabonye amafoto y'ibifaru by'Uburusiya birimo gukururwa n'imashini z'abahinzi b'Abanya-Ukraine".

"Bimwe muri ibyo bifaru byari byasizwe aho ngaho kuko byashiranywe n'ibitoro. Uko ni ukunanirwa mu rwego rw'ibikoresho. Bimwe byaheze mu cyondo cyo mu gihe cy'ubukonje, kuko ubuyobozi bukuru bw'ingabo bwateye mu gihe kibi cy'umwaka".

Nick Reynolds, wo mu kigo RUSI, agira ati: "Abasirikare barwanira ku butaka b'Uburusiya bagizwe n'abinjijwe mu gisirikare ku ngufu n'abinjiye vuba aha. Ibyo bituma baba, mu magambo yumvikana, abarwanyi bo ku rwego rwo hasi no ku rwego rwo hagati na hagati".

"Ibifaru byinshi byasizwe aho ngaho kubera kubitwara nabi. Bimwe byaratwawe birenzwa amateme [birabirinduka]. Ibindi byaratwawe bijyanwa mu miringoti [imiferege] kuburyo ibice byabyo bigenderaho byavuyeho. Ubushobozi bw'abasirikare bwo gukoresha ibikoresho byabo bwarabuze.

"Ariko akenshi, abasirikare bataye imodoka zabo barahunga. Rero n'ubushake bwo kurwana na bwo bwarabuze".

Leta ya Ukraine yanatanze amabwiriza y'ukuntu abaturage bakwiye kuyigezaho imodoka za gisirikare zatawe.