US isaba Ethiopia kwemerera abagenzuzi mpuzamahanga kuhagera mu gihe havugwa itsembabwoko

Amerika yasabye ko abo mu bwoko bw'Abanya-Tigray babarirwa mu bihumbi barekurwa, amakuru avuga ko bagifungiye muri Ethiopia "bazira ubusa", ndetse irashaka ko abagenzuzi mpuzamahanga bemererwa kuhagera.

Bikurikiye raporo ihuriweho y'imiryango iharanira uburenganzira bwa muntu Amnesty International na Human Rights Watch, ishinja ingabo z'akarere ka Amhara gukora "igikorwa cy'itsembabwoko" ku bo mu bwoko bw'Abanya-Tigray mu turere buri ruhande ruvuga ko ari utwarwo ingabo zo muri Amhara zafashe mu minsi ya mbere y'intambara yatangiye mu mezi 17 ashize.

Ibirego byo muri iyo raporo birimo nk'ubwicanyi bunyuranyije n'amategeko, gufunga abantu benshi no gutuma bahunga ku ngufu.

Iyi miryango ibiri iharanira uburenganzira bwa muntu yanavuze ko ingabo za leta ya Ethiopia zatanze uruhushya rwo gukora ubwo bwicanyi ndengakamere cyangwa birashoboka ko zabugizemo uruhare.

Ku wa gatanu, Amerika yagaragaje "guhangayika gukomeye" ku byo yise "ubwicanyi ndengakamere bushingiye ku bwoko" ivuga ko bwakorewe Abanya-Tigray mu karere ka Amhara muri Ethiopia.

Leta ya Ethiopia yavuze ko iyo raporo "nta cyo ifasha" ariko isezeranya "gusuzuma" ibyo birego.

Yishimira amasezerano y'agahenge ko gutuma imfashanyo itangwa yagezweho mu kwezi gushize hagati ya leta ya Ethiopia n'ingabo zo muri Tigray, Amerika yashishikarije impande zombi gutuma imirwano ihagarara no gushaka umuti wumvikanyweho w'iyi ntambara.

Nubwo imirwano yagabanutse cyane nyuma y'ako gahenge, impande zombi zakomeje gushinjanya kubuza imfashanyo kugera muri Tigray, aho abantu babarirwa muri za miliyoni bacyeneye imfashanyo.