Russia - Ukraine: 'Ntidushyigikiye intambara, ariko twiyemeje kudafata uruhande' - Liberata Mulamula

Leta ya Tanzania yashimangiye ko nta ruhande ibogamiyeho mu ntambara iri hagati y'Uburusiya na Ukraine kandi irasaba ko haba ibiganiro ngo irangire.

Ibi ni nyuma y'uko itsinda ry'abambasaderi b'ibihugu by'Iburayi muri Tanzania basabye iki gihugu, n'ibindi bya Africa, kwamagana ibitero by'Uburusiya kuri Ukraine.

Liberata Mulamula, minisitiri w'Ububanyi n'amahanga wa Tanzania, kuwa gatatu yavuze ko iki gihugu kidashyigikiye intambara kandi ko inzira nziza ari iya diplomasi mu guhosha aya makimbirane.

Mu ntangiriro z'uku kwezi kwa Werurwe mu nama rusange idasanzwe ya ONU, Tanzania iri mu bihugu 17 bya Africa byatoye ko ntaho bihagaze mu itora ryo kwamagana ibitero by'Uburusiya no kubushyira mu kato.

Muri aka karere, u Rwanda, DR Congo na Kenya byatoye byamagana Uburusiya mu gihe u Burundi, Uganda, Sudani y'Epfo na Tanzania byatoye ko ntaho bihagaze:

Mu cyumweru gishize, madamu Linda Thomas-Greenfield uhagarariye Amerika muri UN yavuze ko ibihugu bya Africa bidashobora gukomeza kwerekana ko ntaho bihagaze kuri iyi ntambara.

Linda yabwiye BBC ko "nta rubuga rw'abatagira aho begamiye rushobora kubaho" muri iyi ntambara.

Liberata Mulamula we kuwa gatatu yagize ati: "Ntidushyigikiye intambara, ariko twiyemeje kudafata uruhande.

"Duhagaze kuri politiki yacu cyane cyane iy'ububanyi n'amahanga ivuga neza ko nta ruhande dushobora kubogamiraho, cyane cyane mu bintu nk'ibi."