Tanzania: Zuhura Yunus yagizwe umukuru w'itumanaho mu biro bya Perezida Samia Suluhu

Inyandiko gusa
Zuhura Yunus
Insiguro y'isanamu, Zuhura Yunus yahoze ari umunyamakuru wa BBC mu ishami ry'Igiswahili akorera i London

Perezida wa Tanzania Samia Suluhu Hassan yagennye Zuhura Yunus Abdalla wahoze ari umunyamakuru wa BBC ngo abe ukuriye itumanaho mu biro bye.

Mbere yuko ashyirwa kuri uyu mwanya, Madamu Zuhura yari umunyamakuru utegura ibiganiro ndetse unavuga amakuru mu ishami rya BBC ritangaza mu Giswahili akorera i London. Mu kwezi kwa mbere uyu mwaka ni bwo yasezeye muri BBC.

Nkuko bikubiye mu itangazo ryashyizweho umukono n'umuyobozi w'agateganyo w'itumanaho mu biro bya Perezida Samia, Zuhura asimbuye Jaffar Haniu, uyu bivugwa ko agiye guhabwa izindi nshingano.

Zuhura ashyizwe kuri uyu mwanya hashize amezi atangaje igitabo ku buzima bwa Biubwa Amour Zahor, umugore wabaye impirimbanyi muri politiki mu gihe cy'impinduramatwara muri Zanzibar mu 1964.

Zuhura yatangiye itangazamakuru akora ibiganiro n'amakuru kuri radio mu 2008.

Mu mwaka wa 2014, yagiye gukora kuri televiziyo y'ishami ry'Igiswahili kuri BBC, aho yabaye umugore wa mbere utangaza amakuru mu kiganiro cya Dira ya Dunia TV.