Covid-19: Mu Rwanda batangiye gutanga doze ya gatatu y'urukingo

Abagejeje ku myaka 50 mu Rwanda batangiye guhabwa doze ya gatatu y'urukingo rwa COVID-19 mu rwego rwo kubongerera ubudahangarwa.

Uru rukingo kandi runahabwa abakora kwa muganga ndetse n'abasanganywe indwara zikomeye.

Uretse abageze ku myaka 50, n'abakozi bo kwa muganga ndetse n'abafite uburwayi, gahunda yo gukingira isanzwe na yo yakomeje.

Hari abo BBC yasanze bagiye kubona doze ya kabiri ariko bujuje n'ibisabwa byo kuba bahabwa doze ya gatatu.

Itangazo ryaraye risohowe na Ministeri y'ubuzima rivuga ko uhabwa doze ya gatatu agomba kuba amaze iminsi 180 akingiwe ku buryo bwuzuye, ni ukuvuga abonye doze ya kabiri y'urukingo.

Itangwa ry'iyi doze yongera ubudahangarwa ryatangiriye mu mujyi wa Kigali ariko igikorwa kikaba kizakomereza n'ahandi mu ntara.

Kugeza ubu abari bamaze guhabwa nibura doze ya mbere bageraga kuri miliyoni 6 mu gihe abari bamaze guhabwa inkingo ebyiri bagera kuri miliyoni eshatu n'igice.

Ibikorwa byo gutanga urukingo bimaze kugezwa ku byiciro bitandukanye by'abantu kugeza ku bana bafite imyaka 12 basangishwa inkingo ku mashuri.