Rwanda – Covid: Aha mbere mu karere batangiye gukingira ab’imyaka 12

U Rwanda ni igihugu cya mbere muri Africa y'iburasirazuba uyu munsi gitangira gukingira Covid-19 abana bafite imyaka 12 kugera kuri 18.

Benshi baraterwa urukingo babasanze aho biga, ababyeyi babo bagomba gusinya inyandiko z'uko abana babo bakingiwe ku bushake, nk'uko abashinzwe ubuzima babivuga.

Gukingira iki cyiciro cy'abangavu n'ingimbi kuwa kabiri birahera mu mujyi wa Kigali bizakomereze mu bindi bice by'igihugu.

Mu karere, Kenya nayo uyu munsi iratangira gukingira abana bafite kuva ku myaka 15 kugera kuri 18.

Inzobere mu buzima zivuga ko nubwo abana bo muri iki cyiciro batazahazwa na coronavirus ariko iyo bayanduye bayanduza abandi byoroshye.

Umunyamabanga wa leta ushinzwe ubuzima mu Rwanda, Dr Tharcisse Mpunga yatangaje kuri televiziyo y'u Rwanda ko abo muri iriya myaka nabo bagizweho ingaruka na Covid kuko amashuri yabo yagiye afungwa kubera ubwandu bwinshi bwayabonetsemo.

Yongeraho ati: "Uko tugenda dukingira abantu bakuze biboneka ko Covid igenda isatira abana kuko bo badafite ubwo bwirinzi.

"Uko rero inkingo zigenda ziboneka turabona igihe cyo kubakingira kigeze."

Hejuru 52% by'abaturage b'u Rwanda bose ni abatarengeje imyaka 18.

Muri iki gihugu, muri rusange 23% by'abaturage bose bamaze gukingirwa byuzuye, naho hafi 46% bamaze gufata doze ya mbere.

U Rwanda rwageze aha gute?

Mu mpera z'ukwezi kwa cyenda Dr Salla Ndoungou Ba uhagarariye WHO/OMS yagize ati: "u Rwanda rwabaye intangarugero mu mikorere myiza mu karere kuva rwatangira ibikorwa byo gukingira mu kwa gatatu."

Mu karere, nicyo gihugu kimaze gukingira ijanisha rinini ry'abaturage, ibihugu byinshi bya Africa ntibiragera ku gipimo cya 5% cy'abatewe doze zombi z'urukingo.

Leta y'u Rwanda yashyize imbaraga mu gushaka inkingo no gushishikariza abantu kwikingiza.

Abaturage bitabiriye gukingirwa ari benshi, mu gihugu bizwi ko ibyo leta ishishikarije rubanda bihinduka nk'itegeko.

Nubwo ubundi kwikingiza Covid ari ubushake, minisiteri y'ubucuruzi yatangaje ko abacuruzi b'utubari n'abakozi babo bose bemerewe gufungura ibikorwa ari uko bakingiwe.

Inkingo zikigera mu Rwanda inzego z'ubuzima hamwe n'iza gisirikare bafatanyije kuzigeza no mu byaro bya kure hifashishijwe n'indege za gisirikare.

Mu minsi ya vuba, gukingira abantu byaramanutse bigezwa ku masoko, insengero n'aho abantu bategera imodoka mu mijyi.

Muri weekend ishize, abasirikare n'abapolisi nabo bagaragaye mu bice bitandukanye bafasha mu gikorwa cyo gukingira.