Zambia mu matora ya perezida abonwa nk'indyankurye hagati ya Lungu na Hichilema
Abanya-Zambia kuri uyu wa kane bazindukiye mu matora rusange arimo no gutora perezida, abaye mu gihe ubukungu bw'iki gihugu bukomeje kuzahara.
Abagera kuri miliyoni zirindwi ni bo biyandikishije gutora, biganjemo abafite munsi y'imyaka 35.
Polisi n'abasirikare bagabwe mu bice bitandukanye by'igihugu ngo bacunge umutekano ku biro by'itora, ndetse indorerezi mpuzamahanga - za mbere nyinshi zitabiriye amatora muri iki gihugu - zirimo kugenzura imigendekere yayo.
Perezida Edgar Lungu arimo gushaka manda ya kabiri y'imyaka itanu, ariko ntiyorohewe na Hakainde Hichilema, umukandida w'ishyaka rikomeye ritavuga rumwe n'ubutegetsi. Aya matora arimo abandi bakandida 14.
Bwana Lungu, wari mu ba mbere batoreye mu murwa mukuru Lusaka, yabwiye abanyamakuru ati:
"Turimo gutsinda, ntabwo nari kuba niyamamaje iyo tutaba turimo gutsinda". Yavuze ko Abanya-Zambia bagomba "kuza bagatora ari benshi".
Ahavuye isanamu, AFP
Aya matora arimo kubonwa nk'indyankurye hagati ya Bwana Lungu na Bwana Hichilema, mu gihe abatora muri Zambia biganjemo urubyiruko basaba ko habaho amavugurura mu bukungu kandi bakarushaho kubona amahirwe y'akazi.
Akanama k'amatora ka Zambia kavuze ko kazatangaza ibyayavuyemo mu gihe kitarenze amasaha 72.
