Peter Bol: Uwiruka wa Australia ukomoka muri Sudani y'Epfo washimishije igihugu

Ubwo Nagmeldin 'Peter' Bol wa Australia yari ayoboye isiganwa rya 'final' ya 800m mu mikino olempike kuwa gatatu, igihugu cyose cyari 'gifashe iry'iburyo', ngo atsinde.

Bol yamaze umwanya ari imbere ari we uri guha umuvuduko iri siganwa.

Yari kuri 'ecran/screens' nyinshi mu gihugu cye, miliyoni z'abanya-Australia - ubu bari muri guma mu rugo - bari bamushyigikiye.

Niwe muntu usiganwa muri iki cyiciro wa mbere Australia yari igize kuri 'final' mu myaka 53 ishize.

Ariko ntibyarangiye ari imbere. Bagana ku musozo, Bol bamuciyeho, birangira abaye uwa kane.

Nyuma y'isiganwa yagize ati: "Ntabwo nari nzi niba ngiye gutsinda, ariko hari ikintu kimwe nari nzi; Australia yose yariho ireba - ibyo byatumye nkomera."

Kwigarurira imitima

I Tokyo, Bol yaciye imihigo yo muri Australia, intsinzi ye muri 'demi-final' ku cyumweru yaravuzwe cyane mu gihugu.

Mbere ya 'final', kuba byarashobokaga ko Bol w'imyaka 27 wavukiye muri Sudani yatsinda, byateye intege abatuye Australia b'amoko yose. Benshi basomye buri kantu kose mu buzima bwe.

Yavukiye mu gihugu ubu cya Sudani y'Epfo, umuryango we uhungira mu Misiri afite imyaka ine, mbere yo kujyanwa muri Australia kuri visa y'ubutabazi hashize imyaka ine.

Yagiye mu ishuri mu gace kitwa Perth kuri 'bourse' ya basketball, ariko impano ye yo kwiruka yahise ibonwa n'abalimu ba siporo mbere y'uko izamurwa na se n'abatoza b'aho.

Nubwo yari yabanje kwanga uwo mukino, yaje kujya i Melbourne kwitoza bihoraho kwiruka, ndetse kenshi akamara igihe atari kumwe n'umuryango we yaragiye mu masiganwa Iburayi.

Imyaka 10 gusa nyuma yo kwinjira muri uyu mukino, Bol, mu mikino olempike ye ya kabiri, yari mu bihe byiza mu buzima bwe.

Kuwa kane, ibyo yagezeho byarishimiwe cyane muri Australia. Benshi babonye uko yafashije kuzamura ikiganiro cy'uko uwo bita intwari muri Australia akwiye kuba asa.

Craig Foster, umuvugizi w'abasaba ubuhungiro wanahoze ari umukinnyi wa football muri Australia, yaranditse ati: "Kukubona wiruka umutima wawe ari icyatsi n'umuhondo wa zahabu biduha icyizere kinini cya Australia dukwiye kuba yo".

'Icyo dukwiye guharanira kuba'

Ku banya-Australia bakomoka muri Sudani by'umwihariko, kuzamuka vuba kwa Bol akagera ku rwego igihugu kimuhanga amaso byabateye ishema.

Itangazamakuru rya Australia n'abanyapolitiki baho banenzwe kenshi guheza inyuma abo bantu mu myaka ya vuba, ahanini kubera inkuru z'impuha ku rugomo n'amatsinda arikora yo muri bo.

Mu nkuru yahanahanywe cyane muri icyo gihugu, Nyadol Nyuon ubayo ukomoka muri Sudani y'Epfo yanditse ibyo atekereza kuwa gatatu, umunsi wabanjirije kwiruka kwa Bol.

Yagize ati: "Nk'umunya-Sudani y'Epfo wo muri Australia uri kugorwa n'inkomoko n'aho mbarizwa, mu gihe azaba asiganwa nzabyibagirwa ho gato, byose mbishimira Peter Bol, umusore w'ikimenyetso cy'icyo nk'igihugu dukwiye guharanira kuba, atari mu mikino olempike gusa, ahubwo buri munsi".

Gusa uyu mugore yongeyeho ko ibyo Bol yagezeho bidakwiye kuba "igipimo buri wese agomba kugeraho ngo akunde yemerwe muri sosiyete".

Bol nawe avuga ko abantu badakwiye kureberwa mu ishusho y'uko basa cyangwa aho bakomoka.

Mu kiganiro yatanze umwaka ushize yagize ati: "Simbona ko umuntu akwiye gusa kubonwa nk'impunzi cyangwa umwimukira cyangwa ikindi nk'icyo.

"Ntekereza ko ari byiza ko tuganira neza, kugira ngo tumenye umuntu uwo ari we, aho kubyibaza gusa nta shingiro."

Muri iki cyumweru, Bol nabwo yavuze ko ibinyamakuru kenshi byagiye bivuga byibeshya ko yavuye mu nkambi y'impunzi.

Nyuma yo kwiruka final ya 800m kuwa gatatu, umunyamakuru w'iruhande rw'aho birukira amubajije icyo intsinzi ye isobanuye ku banya-Sudani bo muri Australia.

Aramusubiza ati: "Kuri buri wese muri Australia, amaherezo twese turi abantu. Twashimishije igihugu cyose kandi niyo ntego."