Tokyo Olympics: Ornella Havyarimana w’u Burundi yatsinzwe na Nina Radovanovic
Ahavuye isanamu, Luis Robayo - Pool
Ornella Havyarimana yasezerewe mu mikino olempike ku ikubitiro nyuma yo gutsindwa umukino ufungura wa kimwe cy'umunani mu iteramakofe (Boxing) wabereye muri Kokugikan Arena i Tokyo.
Havyarimana yatsinzwe na Nina Radovanovic wo muri Serbia ku manota atanu ku busa muri 'rounds' eshatu bakinnye, Nina yegukanye amanota yose y'abasifuzi batanu.
Mu 2019 Ornella yari yarahuye na Nina muri shampiyona y'isi mu Burusiya, nabwo Nina yari yaramutsinze ku cyemezo gihuriweho n'abasifuzi (abahagarikirizi, mu Kirundi).
Muri kimwe cya kane tariki 01 z'ukwa munani Nina azahura na Huang Hsiao-Wen wo muri Chinese Taipei (Taiwan), muri iki cyiciro cy'abagore bafite hagati ya 48 na 51Kg.
Mu kwezi gushize nibwo Ornella yemerewe umwanya mu mikino olempike ku butumire, ni ubwa mbere yari yitabiriye iyi mikino.
Niwe murundikazi wa mbere userutse mu mikino olempike muri Boxe, agenda yari yizeje ati "nzakora byose bishoboka ntahane umudari", ariko ubu ntibimushobokeye.
Ornella yabwiye BBC ati: "Nakoze ibishoboka, nditanga, ariko sinagize amahirwe yo gutsinda. "Uko biri kose sinakoze neza nkuko nabyifuzaga ngo ngere aho nashakaga kugera".
Ku myaka 24, Ornella niwe murundikazi wenyine uhiganwa muri Boxe ku rwego mpuzamahanga.
'Ornella yakoze ibishoboka ndamushimira'
Joseph Nkamicaniye umutoza wa Ornella avuga ko yitwaye neza mu mukino akerekana ubuhanga bwe.
Yabwiye BBC ati: "Ikindi cyanshimishije ni uko ataviriyemo kuri K.O (knock out) cyangwa kuvanwa mu mukino aho umuhagarikirizi ahagarika bitewe no kurushwa tekinike".
Nkamicaniye avuga ko Nina watsinze Ornella asanzwe akina boxe nk'uwabigize umwuga, kandi usanga abakinnyi nka we bategurwa neza kurushaho.
Ati: "Abo duhura ni abantu baba biteguye neza bafite uburyo bukwiye, bitegura irushanwa mu buryo bwose bushoboka bakabona na 'camping' hanze y'ibihugu n'ibindi, bagashobora kuza biteguye.
"Ahubwo njyewe navuga nti 'Ornella yakoze ibishoboka' murebye 'conditions' twiteguriramo mukareba ukuntu abandi bakinnyi mu bihugu biteye imbere bategurwa jeux olympiques, ubona ko twe tuba twagerageje".
Nkamicaniye avuga ko 'experience' Ornella akuye i Tokyo nayongeraho amarushanwa menshi azagera kuri byinshi mu gihe kiri imbere.
Muri iyi mikino olempike abakinnyi b'Abarundi basigaye guhiganwa ni;
Gusiganwa ku maguru
- Eric Nzikwinkunda - 800m abagabo (Ku wa gatandatu 31/07)
- Olivier Irabaruta - Marathon (42km) abagabo (Ku cyumweru tariki 08/08)
- Francine Niyonsaba - 5,000m abagore (Ku wa gatanu tariki 30/07) na 10,000m (kuwa gatandatu 07/08)
Koga abagore 50m 'nage libre':
- Odrina Kaze - 50m mu itsinda 1 (heat) (Kuwa gatanu tariki 30/07)
- Kimwe na Alphonsine Agahozo w'u Rwanda uri mu itsinda 2
