Tokyo 2020: Flora Duffy yahaye umudari w'amateka 'igihugu' cye Bermuda
Ahavuye isanamu, Getty Images
Bermuda, ituwe n'abaturage 63,000 gusa yabaye igihugu, cyangwa akarere, gito kurusha ibindi cyegukanye umudari olempike wa zahabu ubwo Flora Duffy yatsindaga abandi mu mukino wa triathlon i Tokyo.
Uyu w'imyaka 33, witabiriye iyi mikino ku nshuro ya kane, yasize abandi bagore 56 akoresheje 1h55'36'' - aza imbere ho umunota umwe y'Umwongerezakazi Georgia Taylor n'Umunyamerikakazi Katie Zaferes.
Triathlon ni urukomatane rw'imikino yo gusiganwa ku igare, koga no kwiruka ku maguru intera zitandukanye.
Bermuda yari isanganywe umuhigo w'igihugu gito, cyangwa akarere, cyatsindiye umudari olempike kubera uwa bronze (w'umwanya wa gatatu) wegukanywe n'umukinnyi w'iteramakofe Clarence Hill mu 1976.
Ubu begukanye umudari wa mbere wa zahabu.
Bermuda ni akarere ka kure k'Ubwongereza gafite ubwigenge bugereranyije, igizwe n'ibirwa byinshi aho iri mu nyanja ya Atlantika.
Duffy yagize ati: "Ndibaza ko Bermuda yose ubu yishimye cyane. Ibyo ni umwihariko kuri njye, kuko ibi byari inzozi zanjye. Ariko nari mbizi ko ari binini kunduta."
Duffy wanze guhagararira Ubwongereza kuva ataragira imyaka 20, asanzwe ari mu bitabo by'amateka kuko yabaye umugore wa mbere wo muri Bermuda wabaye uwa mbere muri Commonwealth Games mu 2018.
Yongeyeho ati: "Binteye ishema kuba uwa mbere uhaye Bermuda umudari wa zahabu, umugore wa mbere utwaye umudari, nizeye ko biha icyizere ab'iwacu ko ibi bishoboka."
Mu kumva neza intsinzi ya Duffy, 51Km za triathlon ubwazo ni ndende kurusha kuva ku mpera imwe kugera ku yindi ya Bermuda (40Km). Iki gihugu gifite ubuso bwa 53.2 km2 gusa.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Imvura ya nijoro i Tokyo yakerereje gutangira kw'isiganwa ryabo ho iminota 15 ariko ritangiye Duffy yagiye imbere bamaze kuzenguruka rimwe ntiyongera kureba inyuma.
Inseko nini cyane yahise ihinduka amarira y'ibyishimo ubwo yari yambutse umurongo wo kurangiza ari kumva neza ibyo amaze gukora.
Ati: "Muri kilometero imwe ya nyuma, nagerageje gukomeza ingufu zanjye no kutareka ibitekerezo byanjye bijya ku biri kuba kandi bitaraba.
"Nabonye umugabo wanjye, niwe mutoza wanjye, iruhande rw'umuhanda, muha inseko ntoya gusa.
"Kuva aho nabaye nkureka imbamutima ziraza ariko n'ubu mu kuri sinibaza ko ziraza neza, kereka nyuma y'iminsi micye uhereye ubu."
