Sudan yemeje umushinga w'itegeko wo kwinjira mu rukiko rwa ICC/CPI

Guverinoma ya Sudan y'inzibacyuho (imfatakibanza mu Kirundi) yemeje, nta n'umwe uvuyemo mu bayigize, umushinga w'itegeko ricira inzira kuba umunyamuryango w'urukiko mpuzamahanga mpanabyaha (ICC/CPI).

Minisitiri w'intebe wa Sudan Abdalla Hamdok yabitangaje kuri Twitter ku wa kabiri.

Uyu mushinga w'itegeko wemejwe mu gihe hitegurwa inama ihuriwemo n'akanama kari ku butegetsi muri Sudan ndetse n'abagize guverinoma kugira ngo bawemeze nk'itegeko.

Bwana Hamdok yagize ati: "Ubutabera no gutuma umuntu abazwa ibyo yakoze ni urutirigongo [ishingiro] rwa Sudan nshya, ishishikajwe n'ubutegetsi bugendera ku mategeko twese hamwe dushaka kubaka".

Ibi bitumye Sudan yegereza gushyikiriza ICC abo ishakisha bacyekwaho kugira uruhare mu byaha byo mu ntambara n'ibya jenoside mu karere ka Darfur ko mu burengerazuba bw'igihugu, barimo n'uwahoze ari Perezida Omar al-Bashir.

Mu kwezi kwa gatanu, ICC yasoje igikorwa byo kwemeza ibirego mu rubanza ruregwamo Ali Kushayb wahoze ari mu bakuriye umutwe w'aba Janjaweed, akaba ashinjwa gukora ibyaha byo mu ntambara n'ibyibasira inyokomuntu muri Darfur hagati y'umwaka wa 2003 na 2004.

Kuva mu kwezi kwa munani mu 2019, Sudan iri mu maboko y'ubutegetsi bw'inzibacyuho burangajwe imbere n'abasivile, bwasezeranyije gutanga ubutabera ku bagizweho ingaruka n'ibyaha byakozwe mu gihe cy'ubutegetsi bwa Bashir.

Ibihugu 33 byo muri Afurika ni byo kugeza ubu biri muri ICC, ibyo mu karere bikaba ari Repubulika ya Demokarasi ya Congo, Uganda, Tanzania na Kenya.