Fatou Bensouda: Umushinjacyaha wa ICC asaba Sudan gutanga Ahmed Haroun uregwa ubwicanyi muri Darfur

Umushinjacyaha mukuru w'urukiko mpuzamahanga mpanabyaha (ICC/CPI) yasabye Sudan kurushyikiriza umuntu w'ingenzi ushinjwa kugira uruhare mu byaha byo mu ntambara na jenoside mu karere ka Darfur mu burengerazuba bw'igihugu.

Fatou Bensouda yasabye abategetsi ba Sudan gutanga Ahmed Haroun, inshuti ikomeye ya Omar al-Bashir wahoze ari Perezida akaza guhirikwa ku butegetsi, kugira ngo aburanishirizwe hamwe n'uwahoze akuriye intagondwa bashinjwa ibyaha bimwe.

Ali Abd-Al-Rahman wahoze ari umukuru w'umutwe w'aba Janjaweed, azwi nanone ku izina rya Ali Kushayb. Yishyikirije urwo rukiko mu mwaka ushize.

Madamu Bensouda yaganiriye n'abanyamakuru mu murwa mukuru Khartoum, nyuma yo gusoza uruzinduko mu karere ka Darfur.

Yavuze ko mu cyumweru gishize hemejwe ibirego Ali Kushayb ashinjwa, yongeraho ko "bishinjwa we na Ahmed Haroun", kandi ko bakwiye kuburanishirizwa hamwe.

Intambara muri Darfur yatangiye mu 2003 ubwo imitwe yitwaje intwaro yaho yigomekaga kuri leta ya Sudan, ivuga ko ako karere kirengagizwa.

Leta ya Sudan yasubije iha intwaro aborozi b'Abarabu bagenda baragira bimuka, baje kumenyekana ku izina ry'aba Janjaweed, ibaha akazi ko gukoresha urugomo mu kuburizamo iyo myivumbagatanyo.

Iyo ntambara yaguyemo abantu bagera ku 300.000 naho abandi barenga miliyoni ebyiri bata ingo zabo, nkuko umuryango w'abibumbye (ONU/UN) ubivuga.

Ku wa gatatu, Madamu Bensouda yabwiye abanyamakuru ko urukiko rwa ICC rwagiranye ibiganiro "byiza" na leta ya Sudan ku bijyanye no kurwoherereza uwahoze ari Perezida Bashir, ufungiwe muri gereza i Khartoum, akajya kuburanishwa ku birego birimo na jenoside.