Tanzania: CHADEMA ivuga ko umukuru wayo Freeman Mbowe afungiye i Dar es Salaam
Ahavuye isanamu, Getty Images
Ishyaka CHADEMA ritavuga rumwe n'ubutegetsi bwa Tanzania rivuga ko umukuru waryo Freeman Mbowe ubu afungiye kuri stasiyo nkuru ya polisi mu mujyi mukuru w'ubucuruzi wa Dar es Salaam.
Nkuko iri shyaka ryabitangaje kuri Twitter, Freeman Mbowe yajyanwe kuri iyo stasiyo nyuma yuko polisi isatse mu nzu ye iri i Dar es Salaam. Nta cyo polisi yari yasubiza kuri ibi.
Ni ubwa mbere umuntu wo mu batavugarumwe n'ubutegetsi afashwe agafungwa mu gihe cy'ubutegetsi bwa Perezida Samia Suluhu Hassan.
Aho Mbowe aherereye ntabwo hari hazwi nyuma yuko atawe muri yombi hamwe n'abandi barwanashyaka 11 ba CHADEMA bari muri hoteli yo mu mujyi wa Mwanza mu majyaruguru ya Tanzania.
Haburaga amasaha macye ngo hatangire inama yiga ku ivugurura ry'itegekonshinga yari yitezwe kubera aho i Mwanza.
Imiryango imwe iharanira uburenganzira bwa muntu yanenze bikomeye itabwa muri yombi ry'aba bakuru bo mu batavuga rumwe n'ubutegetsi.
Umuryango Amnesty International uvuga ko ifungwa ryabo "rigaragaza neza ukuntu abategetsi ba Tanzania batita ku butegetsi bwubahiriza amategeko, uburenganzira bwa muntu, burimo n'uburenganzira ku bwisanzure no gutanga ibitekerezo".
Ibitangazamakuru byo muri Tanzania bivuga ko polisi yemeje ifungwa ryabo, bacyekwaho gukora "iteraniro ritemewe".
Abatavugarumwe n'ubutegetsi bamaze iminsi basaba ko haba impinduka mu itegekonshinga.
Umwaka ushize, Mbowe yatezwe igico n'abantu mu ijoro mu murwa mukuru Dodoma ari gutaha iwe baramukubita bikomeye ajya mu bitaro.
Icyo gihe hari hashize amasaha macye Tundu Lissu, undi munyapolitiki uzwi cyane wo muri iri shyaka wari mu Bubiligi, atangaje umugambi we wo guhatanira umwanya w'umukuru w'igihugu.
Mu matora yakurikiyeho muri uwo mwaka John Pombe Magufuli yegukanye intsinzi n'amajwi 84%.
Nyuma y'ayo matora, Freeman Mbowe n'abandi bakuriye ishyaka CHADEMA barafunzwe bashinjwa gutegura imyigaragambyo, nyuma baza kurekurwa.
John Magufuli yaje gupfa mu kwa gatatu uyu mwaka azize indwara y'umutima, nk'uko leta yabitangaje.
