Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Mali yahagaritswe muri ECOWAS kubera ihirikwa ry'ubutegetsi ryakozwe n'igisirikare
Abategetsi bo mu muryango w'ubukungu w'ibihugu by'Afurika y'uburengerazuba (CEDEAO/ECOWAS) bahagaritse Mali mu bihugu binyamuryango nyuma y'ihirikwa ry'ubutegetsi ryo mu cyumweru gishize ryakozwe n'igisirikare - rya kabiri mu mezi icyenda.
Col. Assimi Goïta wayoboye iryo hirikwa ry'ubutegetsi ubu akaba ari we Perezida w'inzibacyuho (cyangwa w'imfatakibanza mu Kirundi), yitabiriye inama yafatiwemo icyo cyemezo yabereye mu murwa mukuru Accra wa Ghana.
Minisitiri w'ububanyi n'amahanga wa Ghana Shirley Ayorkor Botchwey yabwiye abanyamakuru ko uwo muryango wasabye Mali ko ako kanya ishyiraho minisitiri w'intebe mushya w'umusivile kandi igakurikiza igihe cy'inzibacyuho cy'amezi 18.
Yavuze kandi ko Mali yasabwe gukoresha amatora ya perezida mu kwezi kwa kabiri mu 2022.
Ghana yavuze ko kugira ituze kwa Mali ari ingenzi kugira ngo Afurika y'uburengerazuba ihashye ibikorwa by'iterabwoba muri ako karere.
Col. Goïta, w'imyaka 38, yafashe ubutegetsi nyuma yo gutegeka ko uwari Perezida w'inzibacyuho Bah Ndaw n'uwari Minisitiri w'intebe w'inzibacyuho Moctar Ouane batabwa muri yombi, nyuma baje kurekurwa.
