Covid: Leta iri kuvugana n'abakora inkingo ngo baze kuzikorera mu Rwanda

Leta y'u Rwanda iri gukorana n'abafatanyibikorwa ngo bazane uruganda rwa mbere rw'inkingo zikoresheje ubuhanga bwa mRNA muri Africa, nk'uko bivugwa na Perezida Paul Kagame.

Bwana Kagame yatangaje ibi mu kiganiro kireba ku kwitegura no guhangana n'icyorezo, cyabaye ku wa kabiri hifashishijwe ikoranabuhanga ry'iyakure kiyobowe n'uwahoze ari Perezida wa Liberia Ellen Johnson Sirleaf na Helen Clark wahoze ari Minisitiri w'intebe wa New Zealand.

Muri icyo kiganiro, Kagame yagize ati: "Igihe cyose Africa izakomeza kwiringira utundi turere ku nkingo, tuzaguma inyuma ku murongo buri gihe uko zibaye nkeya".

Ku wa kane, Lt Col Dr Tharcisse Mpunga, umunyamabanga wa leta muri minisiteri y'ubuzima, yatangaje kuri televiziyo y'u Rwanda ko leta iri "gushaka uburyo no mu Rwanda hakorerwa izi nkingo".

Dr Mpunga yavuze ko "yaba intambwe imwe ikomeye yatuma dushobora kubona inkingo nk'igihugu ariko tukaba twaha na Africa muri rusange".

Aba bategetsi bombi nta makuru arambuye batanze agendanye n'inganda ziri kuvugana na leta y'u Rwanda n'igihe nyacyo uwo mugambi uzagerwaho.

Dr Mpunga ati: "…ibiganiro bigeze kure sinakubwira ngo ni ejo cyangwa ejo bundi ariko dufite icyizere ko mu gihe cya vuba bizatanga umusaruro".

Uruganda rwo mu Budage BioNTech SE rufatanyije n'urwa Pfizer Inc. rwo muri Amerika zakoze urukingo ruzwi nka Pfizer-BioNTech hakoreshejwe ubuhanga bwa messenger RNA (mRNA).

Uru rukingo ruri mu zatangiye guterwa mu Rwanda mbere y'izindi zatanzwe nk'inkunga mu mugambi wa Covax wo gusaranganya inkingo cyane cyane mu bihugu bikennye.

Mu Rwanda hamaze gutangazwa abantu barenga 25,000 banduye Covid, 338 yishe, n'abarenga 350,000 bayikingiwe nk'uko bivugwa na minisiteri y'ubuzima.