Biden avuga ko ubwicanyi bw'ikivunge bwakorewe Abanya-Armenia bwari jenoside

Joe Biden yabaye Perezida wa mbere w'Amerika usohoye itangazo avuga ku mugaragaro ko ubwicanyi bwo mu 1915 bwakorewe Abanya-Armenia ari jenoside.

Ubwo bwicanyi bwabaye mu minsi ya nyuma y'ubwami bwa Ottoman (Empire Ottoman), ubu bwami bwaje guhinduka Turukiya yo muri iki gihe.

Ariko iyi ni ingingo ikomeye cyane, mu gihe Turukiya yemera ko koko ubwo bwicanyi bwabaye ariko ikanga inyito ya "jenoside".

Ku wa gatandatu, Minisitiri w'ububanyi n'amahanga wa Turukiya Mevlut Cavusoglu yavuze ko igihugu cye "cyamaganye uko cyakabaye" icyemezo cy'Amerika.

Yanditse kuri Twitter ati: "Nta masomo tuzahabwa n'uwo ari we wese ku mateka yacu".

Nyuma yaho, minisiteri y'ububanyi n'amahanga ya Turukiya yavuze ko yahamagaje ambasaderi w'Amerika muri Turukiya ngo imumenyeshe "kubyakira nabi gukomeye" kwayo.

Ubutegetsi bwabanje bw'Amerika ntabwo bwigeze bukoresha ijambo jenoside mu matangazo bwasohoye ku mugaragaro.

Ni mu gihe hari impungenge ko byahungabanya umubano na Turukiya, igihugu kiri mu muryango w'ubwirinzi bw'Uburayi n'Amerika uzwi nka OTAN/NATO.

Habaye iki mu 1915?

Abanya-Turukiya bo muri Ottoman bashinje abakristu b'Abanya-Armenia ubugambanyi nyuma yo gutsindwa bikomeye n'ingabo z'Uburusiya, batangira kubohereza ku bwinshi mu butayu bwa Syria n'ahandi.

Abanya-Armenia babarirwa mu bihumbi amagana barishwe cyangwa bapfa bazize inzara cyangwa indwara.

Ababibonye icyo gihe barimo abanyamakuru, abavugabutumwa n'abadipolomate, bavuze ko ubwicanyi ndengakamere bwakozwe henshi cyane.

Umubare w'Abanya-Armenia bapfuye iteka ntabwo uvugwaho rumwe. Abanya-Armenia bavuga ko abantu hafi miliyoni 1,5 bapfuye. Turukiya igereranya ko bose hamwe abapfuye bagera hafi ku 300,000.

Nkuko bivugwa n'ishyirahamwe mpuzamahanga ry'abashakashatsi bo ku rwego rwa kaminuza ku bijyanye na jenoside (IAGS), umubare w'abapfuye bose hamwe "barenga miliyoni imwe".

Nubwo abategetsi ba Turukiya bemeye ko habaye ubwicanyi ndengakamere, bavuga ko nta mugambi wabayeho wo kurimbura abakristu b'Abanya-Armenia. Turukiya ivuga ko abayisilamu benshi b'Abanya-Turukiya na bo bapfiriye mu kavuyo ko mu ntambara ya mbere y'isi.

Biden yavuze iki nyirizina?

Itangazo rya Bwana Biden, yasohoye mu gihe Armenia yibuka itangira ry'ubwo bwicanyi bw'ikivunge, yagize ati: "Turibuka ubuzima bw'abo bose bapfiriye muri jenoside yakorewe Abanya-Armenia mu gihe cya Ottoman kandi twongeye kwiyemeza gukumira ko ubwicanyi ndengakamere nk'ubwo bwakongera kubaho ukundi".

"Kandi turibuka kugira ngo tujye duhora turi maso turwanya iyangiza riterwa n'urwango uko rumeze uko ari ko kose".

Bwana Biden yavuze ko icyo ashaka "atari ugushinja ahubwo ari ugutuma ibyabaye bitongera kwisubiramo ukundi".

Mbere, yari yarakiriye neza igikorwa cy'inteko ishingamategeko y'Amerika umutwe w'abadepite, mu 2019 yatoye ku bwiganze yemeza ko ubwo bwicanyi bw'ikivunge bwari jenoside.

Uwo mu butegetsi bw'Amerika yabwiye abanyamakuru ko icyemezo cyo gukoresha ku mugaragaro iyo nyito bijyanye no kuba ubu butegetsi bwibanda ku iyubahirizwa ry'uburenganzira bwa muntu.

Mu 1981, uwari Perezida w'Amerika Ronald Reagan yakomoje kuri "jenoside y'Abanya-Armenia" mu itangazo rijyanye na jenoside y'Abayahudi, ariko kuva icyo gihe abandi baperezida b'Amerika birinze gukoresha iyo nyito.

Uwari Perezida w'Amerika Donald Trump wabanjirije ubu butegetsi bwa Bwana Biden, yavuze ko ubutegetsi bwe budafata ubwo bwicanyi nka jenoside.

Ahubwo, Bwana Trump yabwise "bumwe mu bwicanyi ndengakamere bw'ikivunge bubi cyane bwo mu kinyejana cya 20".