Uburusiya bwahamagaje ubuhagarariye nyuma y'ibyo Biden yavuze kuri Putin

Uburusiya bwahamagaje ambasaderi wabwo ngo baganire kugira ngo birinde "ubushyamirane budashobora gukemurwa" na Leta zunze ubumwe za Amerika.

Leta y'Uburusiya ivuga ko ambasaderi Anatoly Antonov yagaruwe i Moscow mu gihe umubano na Amerika ugeze "mu kayira katabona".

Ibi byabaye nyuma y'uko Perezida Joe Biden avuze ko Vladmir Putin "azaryozwa" ibivugwa ko yivanze mu matora.

Mu kiganiro kuri ABC News, Biden yemeje ko atekereza ko Perezida w'Ubursiya ari "umwicanyi".

Biden amaze igihe agira ibyo avuga kuri raporo y'ubutasi bwa Amerika ivuga ko Putin yemeye ko haba ibikorwa byo kwivanga mu matora ya perezida wa Amerika yo mu kwezi kwa 11.

Iyo raporo ishinja Uburusiya gushaka uburyo uwahoze ari Perezida Donald Trump yatsinda, ariko uyu yaje gutsindwa na Joe Biden.

Umuvugizi wa Putin, Dmitry Peskov, yavuze ko ibyo birego nta bimenyetso bifitiwe kandi bishobora guhungabanya imibanire y'ibi bihugu.

Biteganyijwe ko mu cyumweru gitaha Amerika izafatira ibihano Uburusiya kubera ibivugwa n'iyi raporo.

Biden yavuze iki?

Itangazo ryasohowe na minisiteri y'ububanyi n'amahanga y'Uburusiya rivuga ko "Ambasaderi Anatoly Antonov yahamagajwe i Moscow ngo bige ku gikwiye gukorwa ku mibanire na Leta zunze ubumwe za Amerika".

Ryongeraho ko Uburusiya bugamije "kwirinda ko habaho ubushyamirane budashobora gukemurwa".

Biden yabwiye ABC ko mu kwezi kwa mbere, mu kiganiro bagiranye kuri telephone, yaburiye Putin ko hari ingaruka zaba ku bivugwa ko yivanze mu matora.

Mu kiganiro cyatambutse kuwa gatatu, Biden yagize ati: "Azabyishyura".

Abajijwe izo ngaruka izo ari zo, yagize ati: "Muzabibona vuba."

Abajijwe niba akeka ko Putin ari "umwicanyi", Perezida Biden yasubije ati: "Ndabyemera".

Mu kiganiro n'abanyamakuru, Jen Psaki umuvugizi wa White Houseyavuze ko imibanire ya Amerika n'Uburusiya izaba itandukanye no kugihe cya Trump.

Yabwiye abanyamakuru ati: "Nta kabuza Abarusiya bazaryozwa ibyo bakoze,".