Somalia: Manda ya Farmajo yararangiye, yatumije indi nama yo kwiga ku matora

Perezida wa Somalia yatumije inama n'abakuriye za leta zigize iki gihugu ngo baganire ku kibazo cy'amatora yagombaga kuba atarabaye.

Manda ya Perezida Mohamed Abdullahi Farmajo yarangiye kuwa mbere w'iki cyumweru, ariko amatora yari kuba ntiyabaye kubera kunanirwa kumvikana mu biganiro byabaye tariki 05 z'uku kwezi kuri ayo matora.

Impande zitavuga rumwe n'ubutegetsi zivuga ko ubu zidafata Farmajo nka perezida, ndetse zisaba ko hajyaho urwego rw'inzibacyuho.

Ejo kuwa kabiri, akanama gashinzwe umutekano ka UN kasabye abategetsi muri Somalia "kumvikana ku buryo amatora afunguye kuri bose agomba kugenda, bagamije ko aba vuba bishoboka".

Iyi nama ya UN yishimiye inama yatumijwe na Perezida Farmajo izaba kuwa mbere tariki 15 z'uku kwezi.

Mu gihugu benshi barahangayitse bibaza ikigiye gukurikiraho, nk'uko Hassan Bella umunyamakuru wa BBC i Mogadishu abivuga.

Mu gihugu hari abanyapolitiki bifuza ko Farmajo aguma ku butegetsi n'abifuza ko avaho nka senateri Ilyas Ali Hassan wabwiye BBC ko Perezida Farmajo ubu atemewe n'amategeko.

Ubutegetsi bwa leta y'igihugu n'ubutegetsi bwa za leta zigize Somalia kuwa gatanu w'icyumweru gishize bananiwe kumvikana mu biganiro by'uko amatora yari kugenda.

Mu kwirinda icyuho mu butegetsi, umwaka ushize inteko yatoye itegeko ryemerera perezida n'inteko ishingamategeko kuguma mu biro kugeza hatowe ababasimbura.

Amatora y'abagize inteko muri Somalia yagombaga kuba mu kwezi kwa 12/2020 nayo ntiyabaye kuko perezida atumvikanye n'abakuriye zimwe muri leta zigize Somalia uko yakorwa.

Perezida Mohamed Abdullahi Mohamed wahimbwe akazina ka Farmajo (Fromage/Cheese) wigeze kuba minisitiri w'intebe (2010 - 2011) yatorewe manda ya mbere mu 2017.

Muri Somalia, perezida atorwa n'abagize inteko ishingamategeko (abadepite n'abasenateri).