Covid: Mexico, Chile na Costa Rica byatagiye gukingira abantu benshi

Umuforomokazi wo muri Mexique niwe muntu wa mbere wahawe urukingo rwa coronavirus muri Amerika y'Epfo ubwo igihugu cye cyari gitangiye gahunda yo gukingira kuwa kane.

Mexique yakiriye umuzigo wa mbere w'inkingo 3,000 z'urukingo rwa Pfizer-BioNTech rwakozwe na kompanyi y'Abadege ifatanyije n'iy'Abanyamerika.

Iki gihugu gifite umubare munini w'abanduye iki cyorezo ku isi inyuma ya Amerika, Brazil n'Ubuhinde.

Nyuma y'umwanya mutoya Mexique itangiye gukingira kuwa kane, Chile na Costa Rica nabo bahise batangira gutera abantu uru rukingo rwa Pfizer-BioNTech.

Argentina irateganya gutangira gukingira mu minsi micye iri imbere, yahisemo urukingo rw'Uburusiya rwa Sputnik V ku ikubitiro, doze 300,000 ejo kuwa kane nibwo zageze mu murwa mukuru Buenos Aires.

Brazil ifite umubare munini w'abishwe n'iki cyorezo muri ako karere, yo ntiteganya gutangira gukingira mbere y'ukwezi kwa kabiri nubwo abanduye ubu bongeye kwiyongera cyane.

Perezida Jair Bolsonaro we avuga ko adateganya gufata urukingo. Avuga ko umubiri we wagize ubudahangarwa nyuma yo kurwara coronavirus muri uyu mwaka.

'Ubuzima bugomba gukomeza'

Muri Mexico, María Irene Ramirez, w'imyaka 59, ukuriye serivisi yita ku ndembe mu bitaro bya Ruben Leñero niwe muntu wa mbere wakingiwe muri iki gihugu.

Ikinyamakuru EI Universal kivuga ko yagize ati: "Dufite ubwoba ariko ubuzima bugomba gukomeza...kandi ndashaka kuguma ku murongo w'imbere muri uru rugamba".

Dose za mbere 3,000 - muri doze miliyoni 34 baguze - zageze muri Mexique kuwa gatatu zivuye mu Bubiligi, aho ziri gukorerwa.

Leta ya Mexique ivuga ko ishaka gukingira abakozi bose bo mu rwego rw'ubuzima bahanganye n'iki cyorezo bitarenze igihembwe cya mbere cya 2021.

Iki gihugu cyagize abantu barenga miliyoni 1,3 banduye Covid, n'abagera ku 120,000 yishe nk'uko bivugwa na kaminuza ya Johns Hopkins.

Chile ifite abantu hafi 600,000 banduye Covid n'abarenga 16,300 bapfuye, Costa Rica abanduye ni hafi 163,000 n'abarenga 2,000 bapfuye, Argentine handuye hafi miliyoni 1.6 n'abarenga 42,300 bapfuye.

Perezida wa Chile yavuze ko gutangira gukingra iki cyorezo muri iki gihugu ari inkuru y'ikizere n'ibyishimo.

Kuki Argentine yahisemo urukingo rw'Uburusiya?

Mu ntangiriro z'iki cyumweru nibwo abashinzwe ubuzima muri iki gihugu bemeje ko Sputnik V itangira gutangwa - nicyo gihugu cya mbere muri Amerika y'Epfo cyemeje ibi.

Kuwa kane, ikiciro cya mbere cy'inkingo 300,000 zahise ziva i Moscow zigezwa i Buenos Aires.

Perezida Alberto Fernández wa Argentine yameje ko azafata urukingo rwa Sputnik kugira ngo yerekane ko ari ntamakemwa.

Ni nyuma y'uko hari abanenze uru rukingo mu bihugu byo mu Burengarazuba no mu Burusiya ko rwemejwe na mbere y'uko rugeragezwa ku bantu benshi.

Uburusiya bwamaganye ibyo banenga uru rukingo, buvuga ko ibihugu byo mu burengerazuba bishaka kwiharira isoko ry'inkingo ku isi.

Iyi mbonerahamwe irerekane inkingo zimaze kwemezwa, uko zikoze, uko zikora, aho zibikwa n'igiciro