Coronavirus - Rwanda: Uduce twa Nyamagabe na Nyamasheke twashyizwe muri 'Guma mu rugo'

Utugari tumwe two mu karere ka Nyamagabe mu majyepfo na Nyamasheke mu burengerazuba bw'u Rwanda, twasubijwe muri gahunda ya 'Guma mu rugo' mu gihe cy'iminsi 15 kubera coronavirus nk'uko byatangajwe na minisiteri y'ubutegetsi bw'igihugu.

Amabwiriza ategeka abaturage kuguma mu rugo, ashyirwa mu bikorwa n'abashinzwe umutekano mu Rwanda babuza abantu gusohoka mu ngo zabo.

Mu karere ka Nyamagabe utugari twa Ruhunga na Kigeme ni two twashyizwe muri aya mabwiriza avuga ko hasohoka gusa ugiye kwivuza, guhaha cyangwa gutanga 'serivisi ikomeye'.

Akagari ka Kigeme kabamo inkambi y'impunzi z'Abanyekongo zirenga ibihumbi icumi nk'uko bivugwa n'ishami rya ONU ryita ku mpunzi, UNHCR.

Utugari tune(4) - tubiri muri two ni ibice byatwo - two mu karere ka Nyamasheke natwo twashyizwe muri aya mabwiriza akomeye yo kuguma mu rugo.

Minisiteri y'ubutegetsi bw'igihugu ivuga ko yafashe izi ngamba ishingiye "ku busesenguzi bwakozwe n'inzego z'ubuzima ku cyorezo cya coronavirus" muri utwo turere.

Mu minsi irindwi ishize muri Nyamagabe habonetse abantu batanu (5) banduye Covid-19, naho muri Nyamasheke habonetse 20 bayanduye, nk'uko imibare ya minisiteri y'ubuzima ibigaragaza.

Mu mujyi wa Kigali ho mu minsi irindwi ishize habonetse abantu 149 bayanduye, aba biganjemo abari ahafungirwa abantu.

Mu cyumweru gishize, utugari tumwe two mu mujyi wa Kigali ku misozi ya Mont Kigali na Gikondo twagumijwe muri gahunda ya 'Guma mu rugo' mu gihe utundi twayivanywemo.

Imibare y'abanduye Covid-19 mu Rwanda imaze kugera ku 1,416 mu bipimo hafi 200,000 bimaze gufatwa, naho abo yishe ni bane (4) nk'uko bivugwa na minisiteri y'ubuzima.