Abanyarwanda barahitishwamo kubahiriza ingamba cyangwa gusubira muri 'lockdown'
Ahavuye isanamu, Getty Images
Jean Claude Mwambutsa/BBC Gahuzamiryango i Kigali
Muri ibi bihe bidasanzwe byo kwirinda ikwirakwira rya coronavirus, umunyamabanga wa leta muri minisiteri y'ubuzima ushinzwe ubuvuzi bw'ibanze avuga ko Abanyarwanda bafite guhitamo kubahiriza amabwiriza ariho cyangwa gusubira muri "lockdown".
Ejo kuwa mbere ku munsi wa mbere wo gufungura ibikorwa bimwe na bimwe nyuma y'iminsi 45 ibikorwa hafi ya byose mu gihugu buhagaritswe, hamwe na hamwe hagaragaye kutubahiriza amabwiriza amwe yatanzwe.
Kwambara udupfukamunwa, guhana intera hagati y'umuntu n'undi, kutinjira no kudasohoka mu mbago nshya zabaye zishyizweho z'umujyi wa Kigali no kuba abantu bose bari mu ngo zabo saa mbiri z'ijoro ni zimwe mu ngamba nshya zafashwe.
Hagaragaye abantu bafunzwe ndetse bamaranwa igihe kinini na polisi kuko barengeje saa mbiri z'ijoro bataagera mu ngo zabo.
Habonetse kandi abantu bacye batambaye udupfukamunwa n'abatwambara nabi.
Amashusho yakwirakwiye ku mbuga nkoranyambaga yerekanye imirongo miremire y'abagenzi bategereje imodoka zitaza kandi amasaha y'umukwabu yari yageze .
Abaturage bavuga ko imodoka zitwara abagenzi zabaye nke bigatuma benshi batinda ku mirongo bategereje imodoka zibatahana bityo bakarenza amasaha yavuzwe yo kugera mu ngo zabo.
Mu kiganiro kuri televiziyo y'u Rwanda kuri izi ngamba nshya, Pudence Rubingisa uyobora Umujyi wa Kigali yavuze ko basaba abatwara abantu kongera imodoka kugira ngo ibyo ntibyongere kubaho.
Lockdown cyangwa kubahiriza ingamba
Hari abatekereza ko udupfukamunwa twaba ari ducye kuko hari bacye bataratangira kutwambara, Minisiteri y'ubuzima ivuga ko hari abatubahiriza no kutwambara neza.
Dr Tharcisse Mpunga umunyamabanga wa leta muri minisiteri y'ubuzima ushinzwe ubuvuzi bw'ibanze avuga ko kugeza ejo hari hamaze gukorwa udupfukamunwa turenga miliyoni eshatu bityo tutaba dushize.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Muri icyo kiganiro kuri televiziyo yagize ati: "Ahubwo ikibazo wenda ni imico y'abantu, burya guhinduka ako kanya biragorana hari abakitwambara munsi y'akananwa n'ugafite ntiyumve impamvu yo kukambara.
"Abanyarwanda bafite amahitamo abiri; gukurikiza izi ngamba tukambara agapfukamunwa, gukaraba no guhana intera hagati yawe n'undi cyangwa se guhitamo gusubira muri lockdown".
Yongeraho ati: "Kandi ndibaza ko nta muntu ushimishwa no kuguma aryamye mu rugo kuko ntawe byari bimereye neza".
Nyuma yo gutakamba, abatuye inkengero z'umujyi wa Kigali ariko bafite impamvu ituma binjira muri Kigali bemerewe kuhinjira.
Gusa ibi byatangiye gutera impungenge nk'uko bivugwa n'umuyobozi w'Umujyi wa Kigali, yemeza ko hari abari kuva mu zindi ntara bakinjira muri Kigali baciye muri utwo duce tuyegereye.
Biracyagoye kumenya ukwiriye kwemererwa kwinjira muri Kigali n'utabyemerewe, gusa Bwana Rubingisa avuga ko uturere twegereye Kigali twasabwe kwerekana abantu bagomba kwemererwa kwinjira i Kigali
Mu Rwanda, ministeri y'ubuzima ivuga ko mu bipimo 35,096 bimaze gufatwa kuva ku ntangiriro hamaze kuboneka abantu 261 banduye Covid-19 , naho 128 muri bo bayikize.
