Rwanda: Leta yagarukiye Abanyarwanda igabanya igiciro cyo gusura ingagi

Ikigo gishinzwe iterambere mu Rwanda, RDB, cyatangaje igabanuka ridasanzwe ry'igiciro cyo gusura ingagi ku Banyarwanda cyavuye ku madorari ya Amerika 1,500 kigishyira ku madorari 200.

Mu 2017 ubwo iki giciro ku Banyarwanda cyikubye inshuro zirenga 40 byateje impaka, bamwe bavugaga ko leta ishaka ko izo nyamaswa zisurwa gusa n'abanyamahanga bifite.

Itangazo ry'ikigo RDB ryo mu ijoro uyu munsi ku wa gatatu rivuga ko igiciro gishya cyo gusura ingagi ku Banyarwanda n'abaturage b'ibihugu bigize umuryango wa Afurika y'iburasirazuba ari $200 (ni asaga 190,00Frw).

Naho ku banyamahanga baba mu Rwanda bikaba $500. Ibyo biciro bikazakurikizwa kugeza tariki 31 y'ukwezi kwa 12 uyu mwaka.

Ikigo RDB gitangaje ibi nyuma y'uko leta y'u Rwanda uyu munsi yavuze ko ibikorwa by'ubukerarugendo bw'imbere mu gihugu byemerewe gusubukura.

Mbere yo mu kwezi kwa gatanu 2017, Umunyarwanda yishyuraga 30,000 Frw kugira ngo yemererwe gusura izi nyamaswa ziba mu misozi y'ibirunga.

RDB icyo gihe yatangaje ko yazamuye igiciro igamije "kuzirinda abantu benshi cyane" no "kuzirengera ngo zidacika".

Mu itangazo RDB yasohoye uyu munsi, Belise Kaliza ukuriye ishami ry'ubukerarugendo avuga ko "bashishikariza abantu gufata aya mahirwe [y'ibiciro bishya] bagasura ubwiza bw'ibidukikije by'igihugu".

Ikigo RDB ariko kivuga ko abazemererwa gusura pariki y'ibirunga n'iya Nyungwe bagomba kuba hashize amasaha 48 bapimwe bikemezwa ko batanduye Covid-19.

Ikavuga ko hashyizweho ahantu higenga ho kuyisuzuma [igihe bisabwe gusa] kuri stade Amahoro i Remera i Kigali, n'ahandi mu ntara z'igihugu ngo hazashyirwaho ubusabe nibwiyongera.

Ubukerarugendo ni bwo bwa mbere bwinjiriza u Rwanda amafaranga y'amahanga, bugakurikirwa n'ubucukuzi bw'amabuye y'agaciro.

Leta y'u Rwanda ivuga ko 10% by'amafaranga ava mu bukerarugendo akoreshwa mu bikorwa bifitiye akamaro abaturiye za parike.