Intego nshya y’u Rwanda ni ukwinjiza miliyoni $800 buri mwaka mu bukerarugendo

Yves Bucyana, BBC

Uyu muhango ukorwa buri mwaka ugamije guteza imbere ubukerarugendo nka kimwe mu byinjiriza amafaranga menshi u Rwanda muri iki gihe, intego nshya ngo ni uko buzaba bwinjiza miliyoni 800 z'amadorari y'Amerika buri mwaka bitarenze mu myaka itanu iri imbere.

Uyu munsi ku wa gatanu uyu muhango wakorwaga ku nshuro ya 15 aho usanzwe ubera mu Kinigi ku ntango y'imisozi miremire y'ibirunga mu majyaruguru y'u Rwanda.

Abarimo ambasaderi Amina Jane Mohammed (wo muri Nigeria), Hailemariam Desalegn, Areruya Joseph, Louis van Gaal, Neyo, Meddy, Naomi Campbell, Tony Adams, Emmanuel Niringiyimana, ni bamwe mu bakomeye uyu munsi bise amazina abana b'ingagi baheruka kuvuka muri pariki y'ibirunga.

Aba bantu batumiwe kwita amazina abana b'ingagi bagiye bavuga amagambo yo gushima intambwe u Rwanda rwateye mu kurengera ibidukikije no guteza imbere ubukungu.

Abatavuga rumwe n'ubutegetsi bw'u Rwanda bavuga ko hari ibikorwa na Leta idashyira ahabona, bakavugamo ingengo y'imari yishyuwe ikipe ya Arsenal kugira ngo yamamaze ubukerarugendo mu Rwanda.

Clare Akamanzi uyobora ikigo cy'iterambere cy'u Rwanda (RDB) gishinzwe n'ubukerarugendo, yavuze ko uyu muhango wateye imbere kandi uri mu bituma ubukerarugendo bw'u Rwanda bukomera.

Yavuze ko uyu muhango utangira mu Rwanda mu 2003, mu birunga hari ingagi 318, ubu zikaba zimaze kuba 618.

Madamu Akamanzi yavuze ko abasura u Rwanda buri mwaka - baciye mu kirere cyangwa ku butaka - bavuye ku 500,000 bakagera kuri miliyoni 1,7 mu 2018.

Yavuze ko iterambere ry'ubukerarugendo, umutekano n'ibikorwa remezo mu Rwanda byatumya u Rwanda ruhinduka igihugu cya kabiri muri Afurika cyakira inama n'amahuriro mpuzamahanga inyuma ya Afurika y'Epfo.

Ati: "Mu mwaka ushize abantu ibihumbi 38 baje mu nama n'amahuriro mu Rwanda bazana miliyoni 55 z'amadorari".

Ubukerarugendo bw'u Rwanda mu 2017 bwinjije miliyoni zigera kuri 438 z'amadorari, nkuko imibare yatanzwe na RDB icyo gihe ibigaragaza.

Madamu Akamanzi yavuze ko ubu intego bafite ari ugukuba kabiri bakagera kuri miliyoni $800 mu myaka itanu iri imbere.

Perezida Paul Kagame yavuze ko inyungu iva mu bukerarugendo ifitiye igihugu akamaro kandi umugabane wa 10% w'iyi nyungu uzakomeza gushyirwa by'umwuhariko mu bikorwa byo kuzamura imibereho y'abaturiye za pariki bagira uruhare mu kubungabunga ubukerarugendo.