Coronavirus: Burundi, Kenya, Tanzania, Uganda byifashe bite?

Muri Tanzania amashuri yasubukuye, muri Uganda habonetse abanduye benshi ku munsi, mu Burundi biravugwa ko hari abaminisitiri bayanduye, Kenya hari abafungwa 31 banduye naho abayanduye ubu ni hafi 2,000.

Mu Rwanda habonetse abanduye bashya 11 n'uwapfuye wa mbere, leta yagumishijeho ingamba zo kubuza ingendo hagati y'intara n'intara n'umujyi wa Kigali, ahandi mu bihugu by'akarere ho byifashe bite?

Tanzania

Abanyeshuri mu mashuri yisumbuye na za kaminuza uyu munsi basubiye ku masomo nyuma y'amezi abiri batiga, gusa bategetswe kubahiriza ingamba zo kwirinda coronavirus.

Ingengabihe y'amashuri yahagaritswe na coronavirus mu kwezi kwa gatatu, ubu leta yemeje ko amashuri asubukura kuko iki cyorezo cyagabanutse nk'uko umunyamakuru wa BBC i Dar es Salaam abivuga.

Hashize igihe kigera ku kwezi leta ya Tanzania idatangaza imibare y'abanduye, iheruka gutangaza abanduye ari 509 abapfuye ari 21 na 183 bakize.

Perezida John Pombe Magufuli yatangaje ko azareba niba n'amashuri abanza yafungurwa mu gihe ubwandu bukomeje kugabanuka.

Uganda

Ejo ku cyumweru leta ya Uganda yatangaje ko habonetse abantu bashya 84 banduye Covid-19 ku munsi wo kuwa gatandatu gusa, ibi byatumye abanduye bose hamwe bagera 413.

Leta ivuga ko muri abo bashya banduye 52 ari abashoferi b'amakamyo muri abo 50 bakaba barinjiye bavuye muri Sudani y'Epfo, naho 32 ari abayanduriye mu gihugu bahuye n'abandi bayanduye.

Abo bashoferi, 51 ni abanyamahanga bahise basubizwa iwabo nk'uko minisiteri y'ubuzima ibivuga.

Muri Uganda abamaze gukira iyi ndwara ni 72, kugeza ubu ntawe irica.

Muri Uganda ibikorwa byinshi biracyafunze - harimo n'amashuri -mu kwirinda ukwirakwira ry'iyi ndwara.

Ingingo yo gufungura amashuri amwe n'amwe iherutse gutangazwa na Perezida Yoweri Museveni, ntabwo ivugwaho rumwe kuko bamwe mu nteko ishinga amategeko bayinenze cyane.

Burundi

Minisiteri y'ubuzima mu Burundi kuwa gatandatu yatangaje abantu bashya 21 banduye Covid-19 mu bipimo 126 byafashwe mu minsi itanu yari ishize.

Hari amakuru yakwiriye ku mbuga nkoranyambaga ko bamwe mu bategetsi muri guverinoma y'u Burundi baba baranduye iyi ndwara.

Prosper Ntahorwamiye, umuvugizi wa guverinoma y'u Burundi uyu munsi kuwa mbere yabwiye BBC ko "ibyo ntacyo abiziho".

Ibyo bivugwa nyuma y'uko umugore w'umukuru w'igihugu mu Burundi Denise Nkurunziza ari kuvurirwa muri Kenya indwara itaramenyekana kugeza ubu.

Abanduye bose hamwe mu Burundi bamaze kuba 63 umuntu umwe yishe na 33bakize.

Kenya

Imfungwa 31 zoherejwe mu bitaro mu mujyi wa Nairobi nyuma y'uko bazisanzemo coronavirus nk'uko abategetsi babivuga.

Wycliffe Ogallo komiseri mukuru w'amagereza muri Kenya yavuze ko "bafashe ingamba zo kwirinda ko iyi virus ikwirakwira muri gereza 129 ziri mu gihugu".

Gereza muri Kenya zizwiho kuba zuzuriranye.

Mu minsi ishize, leta yarekuye imfungwa 11,000 zari zifungiye ibyaha byoroheje mu kwirinda ikwirakwira ry'iyi virus.

Muri Kenya abantu banduye iyi virus bose hamwe bamaze kugera ku 1,962, abantu 64 yishe na 478 bayikize.

Sudani y'Epfo

Muri iyi weekend, nyuma y'uko visi perezida James Wani Igga atangaje ko yanduye coronavirus ubu ari mu kato k'iminsi 14 iwe mu mujyi wa Juba.

Ushinzwe itangazamakuru mu biro bye yavuze ko bamenye ko Bwana Igga yanduye nyuma y'uko uyu mutegetsi asabye ko abakozi be n'abo mu muryango we bose bapimwa.

Minisitiri w'ubuzima wa Sudani y'Epfo Elizabeth Achuei yasabye Perezida Salva Kiir gutegeka guhagarika ibikorwa byose (lockdown) muri Juba kugira ngo bapime abantu benshi nk'uko ibinyamakuru byaho bibivuga.

Muri iki gihugu abanduye bariyongereye cyane mu minsi ishize, ubu hamaze kuboneka 994, batandatu bayikize na 10 yishe.