Coronavirus - Uganda: habonetse Umurundi w’impunzi baa Nakivale wayanduye

Minisiteri y'ubuzima muri Uganda yatangaje ko habonetse abantu babiri bashya banduye coronavirus, umwe muri bo ni Umurundi w'imyaka 46 w'impunzi wageze muri Uganda avuye muri Tanzania.

Iyi minisiteri yatangaje ko tariki 12/04/2020 uyu yari yashyizwe mu kato avuye muri Tanzania ageze mu karere ka Rakai, akarere kari mu majyepfo ya Uganda gahana imbibi n'intara ya Kagera ya Tanzania.

Minisiteri y'ubuzima ya Uganda ivuga ko uyu asanzwe ari impamzu iba mu nkambi ya Nakivale iri mu karere ka Isingiro mu majyepfo ashyira uburengerazuba bwa Uganda.

Iyi minisiteri ivuga ko uyu yageze muri Uganda nta bimenyetso bya Covid-19 agaragaza agashyirwa mu kato. Ivuga ko ubu agiye kujyanwa mu bitaro bya Masaka.

Ntibizwi neza niba uyu muntu w'impunzi yarageze muri Uganda avuye mu nkambi y'impunzi muri Tanzania, ahari impunzi z'Abarundi zirenga ibihumbi 160.

Muri Uganda ho habarurwa impunzi z'Abarundi 48,232 nk'uko imibare ya UNHCR yo mu kwezi gushize ibivuga.

Imiryango mpuzamahanga itandukanye yagiye itangaza impungenge ifite mu gihe iki cyorezo cyagera mu nkambi z'impunzi ziri mu bihugu bitandukanye muri Afurika.

Leta ya Uganda yafashe ingamba zo gusubiza iwabo abantu batari abaturage ba Uganda basanzemo iki cyorezo, hari abashoferi b'amakamyo babiri basubijwe iwabo muri Kenya na Tanzania.

Kugeza ubu, abantu 58 nibo bamaze kumenyekana ko banduye coronavirus muri Uganda, minisiteri y'ubuzima ivuga ko 38 muri bo bakize.