Rwanda: Col Tom Byabagamba arashinjwa ibindi byaha birimo kugerageza gucika gereza

Igisirikare cy'u Rwanda cyatangaje ko Koloneri Tom Byabagamba azongera akagezwa imbere y'inkiko aregwa ibindi byaha yakoze afunze.

Ibyo byaha aregwa ni ukugerageza gutanga ruswa no kugerageza gucika gereza.

Mu kwezi kwa 12/2019 Col Byabagamba - na Jenerali Frank Rusagara uri mu kiruhuko cy'izabukuru - bakatiwe n'urukiko rw'ubujurire gufungwa imyaka 15 no kwamburwa impeta za gisirikare.

Mu miterere mishya y'inkiko mu Rwanda, nta rundi rukiko aba basirikare bashobora kuregera.

Mu iburanisha mu rukiko rw'ubujurire, Col Byabagamba yavuze ko afunze mu buryo butagenwe n'urukiko.

Yavuze ko amaze imyaka itanu afungiye mu kato, n'itatu adasurwa.

Urukiko rwa gisirikare rwarategetse ko afungirwa muri gereza ya gisirikare iri ku Mulindi, iherereye mu gishanga kiri hagati y'imisozi ya Kanombe na Gasogi mu mujyi wa Kigali.

Col Byabagamba yahamijwe kwamamaza ibihuha bagamije kwangisha abaturage ubutegetsi, gusebya igihugu kandi ari umuyobozi, guhisha ibintu byari gufasha mu kugenza icyaha no gusuzugura ibendera ry'igihugu.

Ibyaha yahamijwe, uyu mugabo wahoze akuriye abashinzwe umutekano wa Perezida Paul Kagame, we yaburanye abihakana.

Kuri ibi byaha bishya aregwa, birimo gushaka gucika gereza, igisirikare cy'u Rwanda kivuga ko azabikurikiranwaho mu rukiko.

Nyuma y'umwanzuro w'urukiko rw'ubujurire mu kwa 12, umwunganizi w'aba basirikare yavuze ko bagiye kureba niba bataregera urukiko nyafurika rw'uburenganzira bwa muntu.

Col Tom Byabagamba na muramu we Jenerali Frank Rusagara bamaze imyaka itanu bafunze.