Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Coronavirus: Perezida Trump yisubiyeho ku gushyira mu kato leta ya New York
Perezida Donald Trump wa Leta Zunze Ubumwe z'Amerika yavuze ko gushyira New York mu kato "bitazaba ngombwa", nyuma yaho guverineri w'iyo leta avuze ko kuyishyira mu kato byaba "bitarimo gushyira mu gaciro".
Bwana Trump yavuze ko icyo cyemezo yagifashe agendeye ku nama yagiriwe n'urwego rwo mu biro bye bya White House rushinzwe guhuza ibikorwa byo guhangana n'icyorezo cya coronavirus.
Mbere yaho, yari yavuze ko ashobora gushyira New York mu kato, ndetse n'ibice bimwe bya leta za New Jersey na Connecticut, mu kugabanya umuvuduko w'ikwirakwira ry'indwara ya Covid-19.
Hari abarwayi barenga 52,000 muri New York banduye iyi ndwara yo mu myanya y'ubuhumekero iterwa n'ubu bwoko bushya bwa coronavirus.
Iyo leta yonyine ubwayo yihariye hafi kimwe cya kabiri cy'abarwayi barenga 124,000 ba Covid-19 muri Amerika yose.
Abarenga 2,100 imaze kubica muri icyo gihugu naho abarenga 2,600 barayikize, nkuko imibare ya Kaminuza ya Johns Hopkins ibigaragaza.
- CORONAVIRUS: Yavuye he, ifata ite, yakwirindwa gute?
- IBINDI BIBAZO WIBAZA KURI IKI CYOREZO: Ibi ni bimwe mu bisubizo
- UMUBIRI UYIRWANYA GUTE: Abahanga bamenye uko bigenda
- DUSABWA KWIRINDA KWIKORA MU MASO: Twabigenza dute?
- WABA URI MU RUBYIRUKO? OMS ivuga ko utakwirara
- KWISHYIRA MU KATO: Ni ryari? Bikorwa gute? Bitanga iki?
Mu butumwa byo kuri Twitter bwo kuri iki cyumweru, Bwana Trump yavuze ko aho kuyishyira mu kato, "ubutumwa bukomeye buburira kudakora ingendo" buzatangazwa muri New York, New Jersey na Connecticut.
Yavuze ko ubwo butumwa buzatangwa n'ikigo cy'igihugu cyo kurwanya no kwirinda indwara kizwi nka 'Centers for Disease Control and Prevention'.
Aganira n'abanyamakuru mu gitondo cy'ejo ku wa gatandatu ku bijyanye n'uko ibintu bimeze muri New York, Bwana Trump yagize ati:
"Twifuza ko yashyirwa mu kato kuko ni yo ndiri...Ndikubitekerezaho".
Yavuze ko kuyishyira mu kato byaba bigamije kugabanya umuvuduko w'ikwirakwira rya coronavirus mu bindi bice by'igihugu.
Yagize ati: "Barikugira ibibazo hepfo muri Florida. Abatuye New York benshi barikujyayo. Ibyo ntitubishaka".
Guverineri wa New York yavuze iki?
Andrew Cuomo, Guverineri wa leta ya New York, yasubije Bwana Trump avuga ko gushyira iyo leta mu kato byaba "bitarimo gushyira mu gaciro" kandi "binyuranyije n'ubunyamerika".
Ati: "Iyo uvuga ko hagendewe ku cyerekezo duherereyemo tubujijwe kugira aho tujya, ibyo ni byo byaba ari akato".
Yavuze ko New York yamaze gushyira mu bikorwa ingamba z'"akato", nko guca ibikorwa bikomeye bihuza abantu benshi no gutegeka abantu kuguma mu ngo.
Ariko avuga ko atakwemeranya n'ibikorwa ibyo ari byo byose byo "gushyira mu kato" iyo leta.
Yabwiye televiziyo CNN ati: "Bibaye ibyo yaba ihindutse Wuhan [mu Bushinwa], kandi ibyo ntibyaba byumvikana".
Yongeyeho ko ibyo byashegesha bikomeye isoko ry'imari n'imigabane kuburyo bitashoboka ko ubukungu bw'Amerika "buzahuka mu gihe cy'amezi, niba ahubwo atari mu myaka".
Ati: "Waba uhagaritse ubuzima bw'urwego rw'imari".
Nyuma yongeyeho ati: "Sinzi uko ibyo [akato] bishobora gushyirwa mu bikorwa mu buryo bw'amategeko. Kandi no mu rwego rw'ubuvuzi, sinzi icyo waba ushaka kugeraho".
