US igiye guhungisha abaturage bayo bari mu bwato Diamond Princess burimo coronavirus

Leta Zunze Ubumwe z'Amerika zirateganya guhungisha Abanyamerika bari mu bwato Diamond Princess, ubwo bwato bukaba ari bwo hantu hari abantu benshi banduye coronavirus hanze y'Ubushinwa, nkuko abategetsi babivuga.

Ubwo bwato buri mu kato ku cyambu cyo mu Buyapani guhera ku itariki ya gatatu y'uku kwezi kwa kabiri. Mu bantu 3,700 baburimo, 218 basanganwe iyo virusi.

Abaturage b'Amerika baburimo ejo ku cyumweru bazahabwa imyanya mu ndege yatanzwe na leta, nkuko bitangazwa n'ambasade y'Amerika mu Buyapani.

Abantu barenga 1,500 bamaze guhitanwa na coronavirus, yatangiriye mu mujyi wa Wuhan mu Bushinwa.

Kuri uyu wa gatandatu, akanama k'ubuzima mu Bushinwa katangaje ko abantu 143 bashya bishwe na coronavirus, umubare w'abo imaze kwica bose ukaba ugeze ku 1,523.

Abo batangajwe uyu munsi yishe bose ukuyemo bane, bakaba ari abo mu ntara ya Hubei.

Abandi bantu 2,641 bemejwe ko bayanduye, ubu umubare w'abamaze kuyandura mu Bushinwa bose hamwe bakaba ari 66,492.

Hanze y'Ubushinwa, hamaze gutangazwa abantu barenga 500 banduye coronavirus bo mu bihugu 24, ndetse na batatu imaze guhitana: umwe muri Hong Kong, umwe muri Philippines n'umwe mu Buyapani.

Iyo virusi muri ubwo bwato bwa Diamond Princess bivugwa ko yazanywe n'umugabo w'imyaka 80 wabuviriyemo muri Hong Kong, nyuma akaza gusanganwa iyo virusi. Abagenzi n'abatwaye ubwato bashyizwe mu kato i Yokohama mu Buyapani kugeza ku wa gatatu.

Australia igiye gukurikiraho?

Abanyamerika babarirwa muri za magana bari mu baheze mu gihirahiro bari muri ubwo bwato, kandi abagera kuri 24 basanganwe iyo virusi.

Ariko mu ibaruwa ambasade y'Amerika i Tokyo mu Buyapani yatangaje, yavuze ko abaturage b'Amerika bafite ubuzima bwiza bazabanza gupimwa ngo harebwe niba nta bimenyetso bya coronavirus bafite mbere yo gushyirwa mu ndege ibatahana iwabo ejo ku cyumweru.

Biteganyijwe ko iyo ndege iguruka yerekeza ku kibuga cy'indege cya gisirikare cya Travis Air Force Base kiri muri leta ya California, aho bamwe mu bagenzi bazagumishwa mu kato mu gihe cy'indi minsi 14.

Igitekerezo cyuko bishoboka ko bazamara icyo gihe kindi mu kato, cyagaragaye nk'icyababaje bamwe mu bari muri ubwo bwato.

Mu butumwa bwo kuri Twitter, umugenzi Matthew Smith yanditse ati:

"Twifuzaga kurangiriza akato mu bwato nkuko byateganyijwe, tukaruhukira umunaniro ahantu hatari mu kato mu Buyapani mu gihe cy'iminsi micye, hanyuma tugasubira muri Amerika bijyanye na gahunda za buri muntu ku giti cye. Ikigoye muri ibyo ni iki?"

Travis Air Force Base hasanzwe hari abandi Banyamerika barenga 200 bahashyizwe mu kato, bakuwe i Wuhan mbere.

Australia na yo iri gutekereza ku gukura abaturage bayo muri ubwo bwato nyuma y'icyo cyemezo cy'Amerika, nkuko bitangazwa n'ikinyamakuru Sydney Morning Herald cyo muri Australia.

Gitangaza ko igiye kuhohereza impuguke mu ndwara zandura ngo yige uburyo bwiza byakorwamo.