Trump yashishikarije Ubushinwa guperereza kuri Biden n'umuhungu we

Perezida Donald Trump wa Leta Zunze Ubumwe z'Amerika, uri gukorwaho iperereza rishobora kumuviramo kweguzwa ku bivugwa ko yasabye igihugu cya Ukraine gukora iperereza k'uwo bahanganye muri politike Joe Biden, ubu yasabye Ubushinwa nabwo kubigenza gutyo.

Yavuze ko Ubushinwa na Ukraine byombi bikwiye gukora iperereza kuri Bwana Biden - uri imbere mu bo mu ishyaka ry'abademokarate baha amahirwe mu matora ya perezida yo mu mwaka utaha.

Bwana Trump yagize ati: "Ubushinwa bukwiye gutangiza iperereza kuri ba Biden".

Abademokarate bashinja Bwana Trump gutinza inkunga ya gisirikare igenewe Ukraine nk'uburyo bwo kotsa igitutu iki ghugu ngo gishake amakuru yasiga icyasha Bwana Biden.

Ikiganiro cyo kuri telefone cyo ku itariki ya 25 y'ukwezi kwa karindwi uyu mwaka hagati ya Bwana Trump na Perezida Volodymyr Zelensky wa Ukraine cyatumye uwamennye ibanga wo mu rwego rw'ubutasi rw'Amerika atanga ikirego cyatumye habaho iperereza rigamije kweguza ku butegetsi Bwana Trump.

Ariko ku munsi w'ejo ku wa kane Bwana Trump yavuze ko iryo perereza, bishobora kurangira rivuyemo ko inteko ishingamategeko y'Amerika imweguje ku butegetsi, ari "umwanda".

Mu butumwa bwo ku rubuga nkoranyambaga rwa Tiwtter Bwana Trump yatangaje ko ari inshingano ze gukora iperereza ku kivugwa ko ari ruswa.

Ati: "...Ubushinwa bukwiye gutangiza iperereza kuri ba Biden kuko ibyabaye ku Bushinwa ni bibi hafi cyo kimwe n'ibyabaye kuri Ukraine".

Bwana Trump yanavuze ko Biden n'umuhungu we "nta muntu n'umwe ushidikanya ko bari baramunzwe na ruswa".

Gusa nta gihamya atanga y'ibyo avuga, Bwana Trump yongeyeho ko Bwana Biden "yakoze uburiganya" ku bindi bihugu kandi ko ari we wo kuryozwa ibibazo by'ubucuruzi n'Ubushinwa byahombeje Amerika.

Ati: "Amasezerano y'ubucuruzi n'abantu nka Biden, aho baha umuhungu we miliyari 1.5 y'amadolari kandi iyo ishobora kuba ari yo mpamvu Ubushinwa bufite amasezerano meza amaze imyaka myinshi cyane yangiza igihugu cyacu".

Umukuru w'akanama k'amatora yasubije kuri ubwo butumwa bwa Bwana Trump na we yibutsa kuri Twitter ko binyuranyije n'amategeko ku muntu uwo ari we wese gusaba ikintu icyo ari cyo cyose cy'agaciro agisaba igihugu cy'amahanga bijyanye n'amatora y'Amerika.

Umuvugizi w'ibikorwa byo kwiyamamaza bya Bwana Biden mu matora ya perezida yo mu mwaka utaha wa 2020 yashinje Bwana Trump "...gushakisha amakuru ayobya yabeshyujwe akanahinyuzwa n'ibitangazamakuru byigenga kandi byizerwa".

Naho umuvugizi wa Biden Hunter, umuhungu wa Joe Biden, we yabwiye ibitangazamakuru byo muri Amerika ko umubare wa miliyari 1.5 y'amadolari y'Amerika (Bwana Trump amushinja ko yahawe n'Ubushinwa) atari ukuri.

Avuga kandi ko uyu muhungu wa Biden atigeze ahabwa amafaranga cyangwa impozamarira na kompanyi yo mu Bushinwa.

Ibya ba Biden n'Ubushinwa bimeze gute?

Mu mwaka wa 2013, Bwana Biden icyo gihe wari Visi-Perezida yagiriye uruzinduko rw'akazi mu Bushinwa, aho yagiranye ibiganiro na Perezida Xi Jinping w'Ubushinwa n'abandi bategetsi b'iki gihugu.

Hunter Biden n'umukobwa we bajyanye na Visi-Perezida muri urwo rugendo, uyu Visi-Perezida Biden akaba na mbere yari yarigeze kujya mu Bushinwa ari kumwe n'abo mu muryango we.

Muri urwo ruzinduko rw'iminsi ibiri, Hunter yahahuriye na Jonathan Li, umukozi wo muri banki w'Umushinwa, waje no guhinduka uwo bakorana ubucuruzi.

Nyuma gato yaho, Bwana Li yashinze ikigo cy'imari kigenga, Hunter aba umwe mu bagize inama y'ubutegetsi muri icyo kigo, nubwo umuvugizi wa Hunter Biden yabwiye igitangazamakuru NBC ko batigeze baganira ku bucuruzi muri urwo ruzinduko yarimo rwa se, kandi ko icyo kigo cyari kimaze amezi bateganya kugishinga na mbere yaho.

Hunter Biden kandi nta mugabane yari agifitemo mu gihe se yari akiri Visi-Perezida w'Amerika, nkuko umuvugizi we abivuga.

Hunter yahakanye ko yahuye n'abategetsi bo mu Bushinwa baganira iby'ubucuruzi.

Ariko amakuru avuga ko yagize uruhare mu gutuma Bwana Li asuhuzanya na Joe Biden mu ruzinduko rwe mu murwa mukuru Beijing w'Ubushinwa, ibintu byateje ibirego byo gukoresha nabi umwanya se yari afite.

Mu kwezi kwa munani uyu mwaka, senateri Chuck Grassley wo mu ishyaka ry'abarepubulikani ukuriye n'akanama k'imari, yanenze ibikorwa bya Hunter muri urwo ruzinduko.

Yavuze ko yari asanzwe afite "amateka yo gushora imari [mu Bushinwa] no gukorana na kompanyi zo mu Bushinwa, nibura imwe muri zo iteje impungenge ku mutekano w'igihugu".