Bwa mbere mu mateka, Sudan yatangije shampiyona y'umupira w'amaguru w'abagore

Amateka yanditswe muri Sudani ejo ku wa mbere ubwo hakinwaga umukino wa mbere wa shampiyona y'igihugu y'umupira w'amaguru mu bagore wabereye ku kibuga cyo ku murwa mukuru Khartoum.

Bamwe mu bafana bateraga hejuru bati, "ubutegetsi bw'abaturage".

Ni ibintu bitari kwibazwa ko hari igihe bizabaho mu gihe Omar al-Bashir yari akiri Perezida - ubwo iki gihugu cyatangira gukurikiza amategeko akaze y'idini ya isilamu mu mwaka wa 1983.

Ubutegetsi bwa Bwana Bashir bwamaze imyaka 30 bwarangiye mu kwezi kwa kane uyu mwaka ubwo yahirikwaga ku butegetsi n'igisirikare ku gitutu cy'abigaragambya.

Kuri ubu iki gihugu kiyobowe n'urugaga rw'abasivile n'abasirikare.

Mervat Hussein, ukuriye umupira w'amaguru w'abagore muri iki gihugu akaba yaranarebye uwo mukino w'ejo ku wa mbere wanditse amateka, yabwiye ikiganiro Newsday cya BBC ko ari "amahirwe nyakuri".

Yagize ati: "Abakinnyi benshi bari bategereje igihe nk'iki kandi aya ni amahirwe nyakuri yo gushobora gutera umupira w'amaguru kera kabaye".

Iyi shampiyona irimo amakipe 21, ikipe za Tahadi na Difaain ni zo zakinnye uyu mukino wa mbere.

Abafana bateraga hejuru bafana aba bakinnyi bagira bati "Kandaka, Kandaka", bisobanura abamikazi ba kera bo mu bwami bwa Nubia.