ONU iravuga ko Koreya ya Ruguru "ikomeje gahunda y'ibitwaro kirimbuzi bya nikleyeri"

Raporo y'umuryango w'abibumbye iravuga ko Koreya ya Ruguru itigeze ihagarika gahunda yayo yo gukora ibitwaro kirimbuzi bya nikleyeri ndetse n'ibisasu bya misile - ibintu ubusanzwe itemerewe bishingiye ku bihano yafatiwe na ONU.

Ni raporo yakozwe ku busabe bw'akanama k'umutekano k'umuryango w'abibumbye.

Iyi raporo inavuga ko Koreya ya Ruguru "yongereye ku bwinshi" uburyo butemewe n'amategeko bwo gukoresha ubwato bugahanahana ibikomoka kuri peteroli ndetse ngo ikomeje kugerageza kugurisha intwaro mu mahanga.

Iyi raporo y'ibanga yakozwe n'itsinda ry'impuguke zidafite aho zibogamiye, yagejejwe ku kanama k'umutekano ka ONU ku wa gatanu.

Kugeza ubu, Koreya ya Ruguru ntacyo yari yatangaza ku bikubiye muri iyi raporo.

Mu cyumweru gishize, abategetsi ba Leta Zunze Ubumwe z'Amerika bavuze ko Koreya ya Ruguru yasaga nk'iri gukora ibisasu bya misile bishya nubwo bwose mu bihe bya vuba bishize umubano hagati y'ibihugu byombi wari utangiye kubyuka.

Ndetse Koreya ya Ruguru yari yasezeranyije guhagarika gahunda y'ibitwaro kirimbuzi bya nikleyeri.

Abategetsi b'Amerika batatangajwe amazina, babwiye ikinyamakuru The Washington Post cyo muri Amerika ko ibyogajuru bikora ubutasi byatahuye ko imirimo igikomeje ahantu hazwi ko hakorewe ibisasu bya misile.

Mu kwezi kwa gatandatu, Perezida Trump w'Amerika yagiranye ibiganiro na Perezida Kim Jong-un wa Koreya ya Ruguru - ibiganiro byabereye mu gihugu cya Singapuru.

Muri ibyo biganiro, abategetsi b'ibihugu byombi basezeranyije ko bagiye gukorera hamwe mu guhagarika gahunda y'ibitwaro kirimbuzi bya nikleyeri. Ariko ntibigeze barasa ku ngingo ngo bavuge neza uko ibyo bizakorwa.

Koreya ya Ruguru isanzwe yarafatiwe ibihano n'ibihugu bitandukanye by'amahanga birimo n'Amerika kubera gahunda yayo y'ibitwaro kirimbuzi bya nikleyeri ndetse n'amagerageza y'ibisasu bya misile.