Muri Australia hatowe ubutumwa bwo mu kinjana ca 19

Icupa ryavuyemwo inzoga yo mu bwoko bwa gin, ryatowe ku nkengera z'amazi mu burengero bwa Australia, ririmwo ubutumwa bwanditse mu kidagi bwarungitswe mu 1886.

Iryo cupa bikekwa ko ryatawe mu mazi n'abari mu bwato bw'Ubudagi mw'ibahari Indiyano, bari mu kugerageza kuraba aho imikuba y'amazi igarukira.

Umuryango wa Kym na Tonya Illman watoye iryo cupa waritwaye mu kigo ndangamico ca Australia.

Umugore yatoye ubwo butumwa yabanje kwibaza ko kwoba ari ugushaka guhuvya abantu, ariko ubwo butumwa bwahavuye busuzumwa n'ikigo ca Australia c'iratiro ry'ivya kahise, basanga koko n'ubwo ico gihe co mu kinjana ca 19.

Dr Ross Anderson, icegera c'umukuru ajejwe ivya kera mukigo c'iratiro rya kahise muri Auistralia, yemeje ko ubwo butumwa ari ubwo ukuri amaze kuvugana na bagenzi we bo mu Budagi na Hollande.

Ubushakashatsi bwakozwe mu bubiko bw'ivya kera bwasanze hari ikinyamakuru candika kw'igendereza ry'ibihe, cegerkana ko umusoza w'ubwato, yataye icupa mu mazi muri ico gihe.

Amatariki n'ikibanza iryo cupa ryari ryasizwemwo, bwahura n'ibiri muri iryo cupa, nk'uko Dr Anderson abivuga.

Umukono wo muri ico kinyamakuru, hamwe n'uwo ku butumwa bwari muri iryo cupa vyarahura.

Kugeza ubu, ubutumwa bwafatwa nk'ubwa kera kurusha ubundi bwose, n'ukuvuga igihe kiri hagati y'aho bwatangiwe n'igihe bwatorewe, bwari ubwo muri Danemark bwatowe mu 1934, bumaze imyaka 108, nk'uko bigaragara mu mahiganwa yo guca imihigo ya Guinness.