Mozambique: Leta yahakanye ko intagondwa zishe abaturage zibaciye imitwe

Leta ya Mozambique yahakanye amakuru yuko intagondwa zigendera ku mahame akaze y'idini ya Isilamu zishe abaturage zibaciye imitwe mu ntara ya Cabo Delgado mu majyaruguru y'iki gihugu.

Valige Tauabo, Guverineri w'iyi ntara ikungahaye ku bitoro, yavuze ko nta bwicanyi buherutse kuba mu karere ako ari ko kose ko muri iyo ntara, bitandukanye n'ibyari byatangajwe.

Yavuze ko ubwicanyi buzwi buheruka gukorwa n'intagondwa ari ubwabaye ku itariki ya 6 y'ukwezi kwa kane uyu mwaka.

Ku wa kabiri, igitangazamakuru cya leta cyari cyatangaje ko abantu barenga 50 bishwe n'imitwe n'intagondwa baciwe imitwe, ku kibuga cy'umupira w'amaguru cyo mu cyaro cyo karere ka Miudumbe.

Ibiro ntaramakuru bya leta ya Mozambique byasubiyemo amagambo y'abarokotse icyo gitero bavuga ko abagabo bitwaje imbunda bateraga hejuru bati "Allahu Akbar" ("Imana ni yo nkuru"), bararasa, batwika n'inzu z'abaturage ubwo batera icyaro cya Nanjaba ku wa gatanu nijoro.

Guverineri Tauabo yavuze ko habayeho "ibitero-shuma [ibitero bito kandi by'igihe gito] by'abagizi ba nabi" babaga bakurikiranywe n'ingabo za Mozambique.

Yongeyeho ko leta ihangayikishijwe n'ikwirakwira ry'ibikorwa by'urugomo bikorwa n'abitwaje intwaro mu ntara ya Cabo Delgado.