Coronavirus: Abakinnyi ba Arsenal bagizweho ingaruka mbere y'umukino na Manchester City
Ahavuye isanamu, Getty Images
Abakinnyi batatu ba Arsenal ntabwo bashoboye gukora imyitozo mu kwitegura umukino wo mu cyumweru gishize yatsinzwe na Manchester City kubera ko umwe muri bo yasanzwemo Covid-19.
Ikipe ya Arsenal yanze gutangaza umwirondoro w'uwo mukinnyi, ariko BBC Sport yumva ko uwo mukinnyi yagize aho ahurira bya hafi n'abandi bakinnyi babiri.
Bijyanye n'amabwiriza ya shampiyona y'icyiciro cya mbere mu Bwongereza - izwi nka Premier League - abo batatu bose bagombaga kwishyira mu kato.
Abo bakinnyi uko ari batatu nta bimenyetso bizwi bya coronavirus bagaragazaga. Bongeye gupimwa, basanze bose ari bazima. Nuko baritoza mbere y'umukino na Manchester City.
Uko ari batatu bakinnye uwo mukino Arsenal yatsinzwe na Manchester City ibitego 3 - 0 ku kibuga Etihad Stadium cya City, ku wa gatatu ushize.
Nyuma yo gutsindwa umukino wo ku wa gatatu ushize, no ku wa gatandatu Arsenal yatsinzwe 2 - 1 na Brighton & Hove Albion, ubu ikaba ihagaze ku mwanya wa 10 aho irushwa na Liverpool ya mbere amanota 43.
