Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
'Abarwanyi' b’Abanyarwanda bafatiwe muri Congo bahawe ingabo z’u Rwanda
Ingabo za DR Congo zahaye iz'u Rwanda abarwanyi bagera kuri 291 bari mu bo zafatiye mu gace ka Kalehe mu ntara ya Kivu y'epfo mu burasirazuba bwa DR Congo nk'uko bitangazwa n'impande zombi.
Aba barwanyi barimo abo mu mutwe wa CNRD/FDLR n'abo muri FLN nk'uko Major Jean Louis Tshimwang wo mu buvugizi bw'ingabo muri Kivu y'Epfo yabibwiye abanyamakuru.
Aba barwanyi, bari kumwe n'abana 11, bashyikirijwe ingabo z'u Rwanda ku mupaka wa Rusizi ya mbere ejo kuwa mbere.
General Major Alex Kagame uyobora ingabo z'u Rwanda mu ntara y'Iburengerazuba yabwiye abanyamakuru ko iki gikorwa kizaha amahoro abaturage b'ibihugu byombi.
Yagize ati: "Turi gukorana, turi inshuti, ibihugu byacu bibanye neza kimwe n'ingabo zacu".
Ephrem Kayumba uyobora Akarere ka Rusizi yabwiye BBC ko ataramenya amakuru y'abo barwanyi bagejejwe mu Rwanda, ko ayo azi ari ay'abazanywe mu minsi micye ishize.
Ati: "Abaje ejo bundi ni imiryango yabo, ni abana n'abagore. Niba hari abaje uyu munsi [kuwa mbere] ntabwo ndabimenya".
Mu ntangiriro z'uku kwezi, ingabo za DR Congo zatangaje ko zafashe abarwanyi 1,000 bo muri iyi mitwe irwanya ubutegetsi bw'u Rwanda mu gace ka Kalehe muri Kivu y'Epfo.
Icyo gihe Faustin Twagiramungu, umuvugizi w'impuzamashyaka MRCD itavuga rumwe n'ubutegetsi bw'u Rwanda ifite umutwe w'inyeshyamba muri Congo, yabwiye BBC ko ibyakozwe kandi bikomeje ari ubwicanyi ku mpunzi.
Bwana Twagiramungu yavuze ko ingabo z'u Rwanda zifatanyije n'iza DR Congo zakoze ibitero ku mpunzi z'Abanyarwanda mu mpera z'ukwezi gushize.
Umuvugizi w'ingabo za DR Congo muri Kivu y'Epfo Kapiteni Dieudonné Kasereka yabwiye BBC ko "ibikorwa bya gisirikare biri gukorwa hose mu burasirazuba bikorwa n'igisiriakre cya leta cyonyine".
Yavuze ko mu mirwano y'ingabo n'inyeshyamba abaturage batatanye, bagafata inyeshyamba.
Inyeshyamba z'Abarundi, Abanyarwanda n'Abanya-Uganda ziba mu burasirazuba bwa DR Congo zishinjwa ibikorwa byo guhungabanya umutekano mu karere.
Ibikorwa byihariye byo kurwanya iyi mitwe y'abanyamahanga bimaze amezi abiri bitangijwe n'ingabo za DR Congo.
