Rwanda: Umutoza mushya wa Rayon Sports yasabwe kuyiha ibikombe bibiri

Javier Martinez Espinosa ni umutoza w'umupira w'amaguru ukomoka muri Mexique wagizwe umutoza mushya wa Rayon Sports, yasabwe kuyiha ibikombe bibiri.

Mu kwezi kwa karindwi umutoza Roberto Oliveira uzwi nka Robertinho yasezeye muri Rayon Sports, iyi kipe ubu yatozwaga na Kayiranga Baptiste wahoze ari umukinnyi wayo hambere.

Jean Paul Nkurunziza umuvugizi wa Rayon Sports yabwiye BBC ko Javier Martinez Espinosa bamusabye gutwara ibikombe bibiri; igikombe cy'amahoro n'icya shampiyona.

Rayon Sports niyo yatwaye igikombe cya shampiyona y'umupira w'amaguru umwaka ushize.

Rayon Sports iheruka gusezererwa mu marushanwa y'amakipe yabaye aya mbere iwayo muri Afurika itozwa na Kayiranga Baptiste wari umutoza w'agateganyo.

Bwana Nkurunziza ati: "Namara gutwara ibi bikombe agomba twamusabye kutugeza nibura mu matsinda ya CAF Champions ligue cyangwa akaturenza muri 1/4 cya confederation cup".

Bwana Espinosa w'imyaka 46 yakinnyi umupira w'amaguru iwabo muri Mexique, atangira ibyo kuwutoza mu 2012 atoza amakipe y'iwabo.

Mu 2016 yatoje ikipe ya Carcha muri Guatemala, mu 2017 atoza ikipe yitwa Juventus FC yo muri Nicaragua.

Yatoje bwa mbere muri Afurika mu mwaka ushize ubwo yatozaga ikipe ya Vipers yo muri Uganda.

Bwana Nkurunziza ati: "Twamubwiye ko abafana bacu bakunda umupira uyunguruye nk'uko bajya babiririmba, turamusaba kuzabashimisha kandi twizeye ko azaduha n'ibikombe".

Uyu mutoza arerekwa abafana ba Rayon Sports uyu munsi mu burasirazuba bw'u Rwanda aho iyi kipe ikina umukino wa Gicuti na Etoile de l'Est yo mu karere ka Ngoma.