U Burundi mu kibanza ca 3 mu gikombe c'isi c'abana bo mw'ibarabara

Inyandiko gusa
Ikipe y'umupira w'amaguru y'abana bahoze mw'ibarabara bo mu Burundi, yatahukanye ikibanza ca gatau mu gikombe c'isi
Insiguro y'isanamu, Ikipe y'umupira w'amaguru y'abana bahoze mw'ibarabara bo mu Burundi, yatahukanye ikibanza ca gatau mu gikombe c'isi

Umugwi w'Imboneza FC New Genaration waserukiye u Burundi mu nkino z'igikombe c'isi z'abana bahoze mw'ibarabara, i Moscou mu Burusiya, uhejeje kuronka ikibanza ca gatatu muri izo nkino.

U Burundi bwatsinze igihugu ca Indonésia ibitsindo 3-1, igitsindo ca mbere cinjijwe n'umwana yitwa Christian Ndihokubwayo, ica kabiri cinjijwe na Assumani Massudi, kizigenza w'uwo mugwi w'Imboneza FC, hanyuma ica gatatu cinjizwa na Arnaud Ndahabonimana.

Mu gice ca kabiri gishira ica nyuma, u Burundi bwari bwakuwemwo na Uzbekistan butsinzwe igitego 1-0.

U Burundi bwari bwatanguye ihiganwa neza aho bwatsinze Indonesia 2-0, butsinda Brezil ibitego 4-1, hanyuma bwongera buratsinda kandi igihugu ca Bielorussie ibitego 3-0.

Iryo higanwa ryitabwe n'abana bo mw'ibarabara barenga 200 bavuye hirya no hino kw'isi ubu bakaba bakoraniye i Moscow.

Mu nkino zibanza Uburundi bwitwaye neza bukaba bwaratsinze Brezil ibitego 4-1
Insiguro y'isanamu, Mu nkino zibanza Uburundi bwitwaye neza bukaba bwaratsinze Brezil ibitego 4-1

Abakobwa n'abahungu baje baserukira imigwi 24 nserukirabihugu y'abana baba mw'ibarabara, mu rwego rwo gukangurira abantu ko abo bana na bo bakeneye kwitabwaho co kimwe n'abandi bana bose.

Urukino rwa nyuma (final) ruja guhuza igihugu ca Pakistan na Ouzbekistan.