Fel Clamydia, mae Gonorrhoea yn gallu arwain at broblemau mawr. Ymhlith merched, mae'n gallu arwain at glefyd llid pelfig ('pelvic inflammatory disease', neu 'PID', yn Saesneg), beichiogrwydd ectopig, esgor cynnar a babanod marw-anedig.

Dyw pethau ddim lot gwell i chi'r bechgyn: mae'n gallu heintioch llygaid, eich llwnc, eich twll tin - ac os oes gynnoch chi heintiau cysylltiad rhywiol eraill, y siawns yw na fyddwch chi'n gweld yr arwyddion.

A beth yw'r arwyddion?

Fechgyn, gwyliwch am biso'n fwy aml, llosgi, a rhedlif gwyrdd/melyn yn dod o'ch pidyn.

Ferched - efallai y byddwch chi'n sylwi ar redlif, piso'n fwy aml, poen wrth gael rhyw, misglwyf afreolaidd a phoen yn isel yn eich stumog neu yn eich pelfis.

Grêt, ond yfe?

Sut mae'n cael ei lledu?

Ych chi'n gallu dal Gonorrhoea drwy unrhyw fath o ryw heb gondom: rhyw arferol, rhyw geg neu ryw refrol (lan eich twll tin) gyda phartner sydd â'r afiechyd. Does dim rhaid i chi gael rhyw treiddiol i ddal yr haint hon - gallwch chi ei dal hi drwy gyffwrdd ag organau cenhedlu. Mae gynnoch chi fwy o siawns o'i dal os ych chi'n cysgu o gwmpas, os yw'ch partner yn cysgu o gwmpas, neu os ych chi ddim yn gwisgo condom.

Byddwch chi'n sylwi arwyddion yr afiechyd o fewn pythefnos o'i dal.

Sut ych chi'n mynd i ofalu am eich darnau?

Os yw'r haint gynnoch chi, peidiwch â chael rhyw nes i chi orffen eich triniaeth. Dywedwch wrth eich partneriaid rhyw am eich haint iddyn' nhw gael eu profi a'u trin.

O, ie - gwisgwch gondom bob tro - y merched ar bechgyn!