ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
ယူကေမှာ ကိုဗစ်၁၉ ရောဂါဆိုးလာသူတွေအတွက် အောက်စီဂျင်ပေး အသက်ရှူစက် လောက်ရဲ့လား
ကိုရိုနာဗိုင်းရပ်စ် ကိုဗစ် ၁၉ ကူးစက်ခံရပြီး အသက်အန္တရာယ် စိုးရိမ်ရတဲ့အထိ အသက်ရှူရ ခက်ခဲတဲ့ ရောဂါလက္ခဏ ပြလာသူတွေကို ကုသရာမှာ အောက်စီဂျင်ပေး အသက်ရှူစက်တွေက အဓိက ကျနေပါတယ်။
ဒါ့ကြောင့် နိုင်ငံအသီးသီးက ဒီစက်တွေ များများသိုလှောင်ထားကြဖို့ ကမ္ဘာ့ကျန်းမာရေးအဖွဲ့ WHO က ပြီးခဲ့တဲ့ မတ်လ ၂ ရက်နေ့မှာ ထုတ်ပြန်ထားခဲ့ပါတယ်။
အဲဒီနောက်ပိုင်းမှာ ယူကေဝန်ကြီးချုပ် ဘောရစ် ဂျွန်ဆင်က ကားကုမ္ပဏီတွေ အပါအဝင် အင်ဂျင်နီယာပိုင်းဆိုင်ရာ ကုမ္ပဏီတွေက ဒီစက်တွေ အမြောက်အများ ထုတ်လုပ်ရာမှာ ကူညီပေးကြဖို့ တိုက်တွန်းခဲ့ပါတယ်။
လက်ရှိ မတ်လကုန် ရောက်လာတဲ့အချိန်မှာတော့ တရုတ်နိုင်ငံပြင်ပ ကိုရိုနာဗိုင်းရပ်စ် ပြန့်ပွားမှုက WHO က အဲဒီလို ထုတ်ပြန်ခဲ့တဲ့ အချိန်ကထက် သိသိသာသာ ပိုဆိုးလာပြီး ရောဂါကူးသူ တွေ့ရှိရမှုမှာ အမေရိကန်ကော အီတလီပါ တရုတ်ထက် များသွားပြီ ဖြစ်ပါတယ်။
ဒါ့အပြင် မတ်လ ၂၉ ရက်နေ့ စာရင်းဇယားအရ ဒီရောဂါကြောင့်သေဆုံးသူ အရေအတွက်မှာ ဆိုရင် အီတလီက တရုတ်ထက် သုံးဆနီးပါး များသွားပြီ ဖြစ်ပါတယ်။
မတ်လ ၂၉ ရက် စာရင်းဇယားအရ အမေရိကန်မှာ ကိုရိုနာဗိုင်းရပ်စ် ကူးစက်နေသူ ၁၂၀ဝ၀ဝ ကျော်နဲ့ သေဆုံးသူ ၂၀ဝ၀ ကျော် ရှိပြီး အီတလီမှာတော့ ကူးစက်ကြောင်းတွေ့ရှိသူ ၉ဝ၀ဝ၀ ကျော်နဲ့ သေဆုံးသူကတော့ တသောင်းကျော် အထိ ရောက်လာတာ ဖြစ်ပါတယ်။
အခုလို အခြေအနေတွေ ဖြစ်လာတဲ့အချိန်မှာ ယူကေအစိုးရက ဥရောပသမဂ္ဂရဲ့ အောက်စီဂျင်ပေး အသက်ရှူစက် စုဆောင်းရဲ့ စီမံချက်ထဲမှာ ပါဝင်ဖို့ နောက်ဆုံးရက်ကို မမီလိုက်ဘူး ဆိုတာကြောင့် အတိုက်အခံ ပါတီတွေက အပြင်းအထန် ဝေဖန်ခဲ့ပါတယ်။
အစောပိုင်းမှာ အီးယူအဖွဲ့ဝင် မဟုတ်တော့တာကြောင့် မပါတာလို့ ယူကေအစိုးရက ပြောပေမယ့် အီးယူဘက်ကတော့ ယူကေလည်း ပါလို့ရတယ် ဆိုတာကြောင့် ပိုမို ဝေဖန်ခံခဲ့ရပြီး ဒီစီမံချက်ထဲ ပါဝင်ဖို့ အီးမေးမရခဲ့ဘူးလို့ မတ်လ ၂၆ ရက်နေ့မှာ ယူကေအစိုးရက ကာကွယ်ပြောဆိုခဲ့ရပါတယ်။
ဒါပေမယ့် နောက်ပိုင်း အီးယူရဲ့ အလားတူ စီမံချက်တွေမှာတော့ ပါဝင်နိုင်တယ်လို့လည်း ယူကေအစိုးရက ပြောပါတယ်။
ကိုရိုနာဗိုင်းရပ်စ်ရောဂါသည်တွေအတွက် ဒီစက်တွေက ဘယ်လောက် အရေးကြီးသလဲ
ကိုရိုနာဗိုင်းရပ်စ်ကြောင့် အခြေအနေဆိုးလာသူတွေ အနေနဲ့ အဆုတ်မှာ အဓိကထိခိုက်လာတဲ့အတွက် အသက်ရှူရ ခက်ခဲလာလေ့ ရှိတာကြောင့်အခုလို စက်တွေ များများရှိထားဖို့ အရေးကြီးနေတာ ဖြစ်ပါတယ်။
အခုလို အဆုတ်ထိခိုက်လာတဲ့အချိန်မှာ ကိုယ်ခံအားစနစ်က သွေးကြောတွေကို ကျယ်စေပြီး ကိုယ်ခံအား ဆဲလ်တွေ များများဝင်ရောက်အောင် ကြိုးစားတဲ့အတွက် ဘေးထွက်ဆိုးကျိုး အနေနဲ့ အဆုတ်ထဲကို အရည်ဝင်လို့ အသက်ရှူရ ခက်ခဲလာစေပြီး တကိုယ်လုံးအတွက် လိုအပ်တဲ့ အောက်စီဂျင်လည်း မလုံလောက်တာတွေ ဖြစ်လာနိုင်ပါတယ်။
အဲဒီစက်တွေဟာ အောက်စီဂျင်ပေးရုံ သက်သက်သာ မဟုတ်ပဲ ရှုလိုက်တဲ့ လေနဲ့အတူပါလာတဲ့ ကာဘွန်ဒိုင်အောက်ဆိုဒ်ကိုလည်း စွန့်ထုတ်ပေးနိုင်ပါတယ်။
ဒီစက်တွေနဲ့ ချိတ်ဆက်ထားတဲ့ ပိုက်ကို နှာခေါင်း ဒါမှမဟုတ် ပါးစပ်နဲ့ ဆက်သွယ် အသုံးပြုရပြီး ဒီလိုလုပ်ဖို့ပါ အခက်အခဲရှိလာတဲ့ လူနာတွေမှာတော့ လည်ပင်းမှာ အပေါက်ဖောက်ပြီး အောက်စီဂျင်ပေးရပါတယ်။
အခုလို အောက်စီဂျင်ပေးရာမှာ များသွားရင်လည်း ကျန်းမာရေး ထိခိုက်နိုင်ပြီး လူနာရဲ့ အဆုတ်တွင်း လေစီးဆင်းမှု၊ အပူချိန်၊ စိုထိုင်းဆနဲ့ ဖိအားတွေကိုလည်း တိတိကျကျ စောင့်ကြည့် ဖော်ပြနိုင်တဲ့ စက်တွေ လိုအပ်နေတာ ဖြစ်ပါတယ်။
ယူကေမှာရှိပြီးသား အောက်စီဂျင်ပေး အသက်ရှူစက်တွေနဲ့ လောက်ပါ့မလား
ယူကေ အစိုးရအနေနဲ့ကတော့ လောလောဆယ်မှာ ရှိပြီးသား အောက်စီဂျင်ပေး အသက်ရှူစက် ပုံစံမျိုးစုံကို လိုက်ဝယ်နေတယ်လို့ ဘီဘီစီကို ပြောပါတယ်။
မတ်လ ၂၆ ရက်နေ့ စာရင်းအရ ယူကေနိုင်ငံရဲ့ နိုင်ငံတော်ကျန်းမာရေးစနစ် NHS မှာ အဲဒီစက် ၈၀ဝ၀ ကျော်သာ ရှိပြီး လောလောဆယ်မှာ ပြည်တွင်းပြည်ပ ကုမ္ပဏီတွေဆီကနေ နောက်ထပ် ၈၀ဝ၀ ကျော် ထပ်မံ ဖြည့်တင်းနိုင်တယ်လို့ ယူဆထားပါတယ်။
လက်ရှိ ခန့်မှန်းတွက်ချက်ထားချက်အရ တကယ်တမ်း ရောဂါလက္ခဏာပြင်းထန်သူတွေ များလာရင် NHS မှာ အနည်းဆုံး အဲဒီ အသက်ရှူစက် ၃၀ဝ၀ဝ ရှိထားဖို့ လိုတယ်လို့ ဆိုပါတယ်။
ဒါ့ကြောင့်လောလောဆယ်မှာ ယူကေ တိရိစ္ဆာန် ဆေးကုဆရာဝန်တွေမှာ ရှိတဲ့ တိရိစ္ဆာန်သုံး အောက်စီဂျင်ပေး အသက်ရှူစက်တချို့ကို အသုံးပြုခွင့်ပေးဖို့ NHS က မေတ္တာရပ်ခံထားပါတယ်။
ယူကေနိုင်ငံမှာ တိရိစ္ဆာန်သုံး အောက်စီဂျင်ပေး အသက်ရှူစက် စုစုပေါင်း ၄၀ဝ လောက်ရှိတယ်လို့ ခန့်မှန်းထားပြီး ခွေးထက်ကြီးပြီး မြင်းအရွယ်လောက်အထိလည်း မကြီးတဲ့ သတ္တဝါတွေအတွက် ထုတ်လုပ်ထားတဲ့ စက်တွေဆိုရင် လူတွေအတွက် အသုံးပြုလို့ရနိုင်တယ်လို့ ကျွမ်းကျင်သူတွေက ပြောဆိုထားတာ ဖြစ်ပါတယ်။
တိရစ္ဆာန်ငယ်တွေအတွက် ဒီစက်တွေ ထုတ်လုပ်တဲ့ ဗက်ထရွန်းနစ် ကုမ္ပဏီကလည်း ရှိနေတဲ့ စက်တွေကို လူတွေမှာ အသုံးပြုနိုင်ဖို့ ပြင်ဆင်ပေးနေတယ်လို့ ဆိုပါတယ်။
ဒိုင်ဆင်ကုမ္ပဏီရဲ့အောက်စီဂျင်ပေး အသက်ရှူစက် ပုံစံထုတ်မှုအသစ်
ယူကေနိုင်ငံမှာ ဖြစ်ပွားနေတဲ့ ကိုရိုနာဗိုင်းရပ်စ်အခြေအနေကို ကူညီဖြေရှင်းပေးဖို့အတွက် ဒိုင်ဆင် လျှပ်စစ်ပစ္စည်းကုမ္ပဏီက ဆေးဘက်ဆိုင်ရာသုံး အောက်စီဂျင်ပေး အသက်ရှူစက် ပုံစံအသစ်ကို ထုတ်လုပ်တော့မယ်လို့ မတ်လ ၂၄ ရက်နေ့က ကြေညာခဲ့ပါတယ်။
အခုလို ကြေညာအပြီး နောက် ၂ ရက်မှာပဲ နိုင်ငံတော်ကျန်းမာရေးစနစ် NHS အတွက် အဲဒီစက်အလုံးတသောင်း ဝယ်ယူမယ်လို့ အစိုးရက ကြေညာခဲ့ပါတယ်။
ဒိုင်ဆင်ကုမ္ပဏီဟာ ယူကေနိုင်ငံ ကိန်းဘရစ်ဂျ်မြို့ အခြေစိုက် ဆေးပစ္စည်း ကုမ္ပဏီတခုဖြစ်တဲ့ The Technology Partnership နဲ့ ပူးပေါင်းပြီး တိတိကျကျ အချိန်မီ ဖန်တီး ထုတ်လုပ်နိုင်ဖို့ ကြိုးစားနေတယ်လို့ ဆိုပါတယ်။
အခုလို ဖန်တီး ထုတ်လုပ်မှုကို ဆေးဘက်ဆိုင်ရာ စက်ပစ္စည်း ထုတ်လုပ်မှု စည်းကမ်းနဲ့အညီ ဓါတ်ခွဲခန်းမှာ စမ်းသပ်မှုနဲ့လူတွေမှာ စမ်းသပ်မှုတွေလည်း လုပ်ရမှာ ဖြစ်ပြီး များများထုတ်လုပ်နိုင်ဖို့လည်း ရည်မှန်းထားတယ်လို့လည်း ဒိုင်ဆင်ကုမ္ပဏီ ဥက္ကဌ ဖြစ်တဲ့ ယူကေနိုင်ငံသား တီထွင်ပညာရှင် ဂျိမ်းစ် ဒိုင်ဆင်က ပြောပါတယ်။
အခုလို ထုတ်လုပ်မယ့် စီမံကိန်းအတွက် ရာနဲ့ချီတဲ့ ဒိုင်ဆင်ကုမ္ပဏီရဲ့ အင်ဂျင်နီယာတွေက နေ့မအား ညမအား ပုံစံထုတ်နေတယ်လို့ ဆိုပါတယ်။
ဒီစီမံကိန်းအတွက် ကုမ္ပဏီရဲ့ ယူကေ အခြေစိုက်ရုံးရှိရာ ဝစ်(လ်တ်)ရှား ဒေသက လေယာဉ်ဂိုထောင်တွေမှာ အလုံးအရင်း ထုတ်လုပ်ဖို့ စီစဉ်ထားပြီး နောက်ဆုံး ထုတ်မယ့် ပုံစံရရင် စပြီး ထုတ်လုပ်ဖို့အထိကတော့ ရက်သတ္တပတ်နဲ့ချီပြီး ကြာနိုင်တယ်လို့ ဆိုပါတယ်။
စကော့တလန် ဂလာစကို တက္ကသိုလ်က ဇီဝနဲ့ဆေး အင်ဂျင်နီယာပညာ ဒေါက်တာ မာရီယွန် ဟာ့ရှ်ကတော့ ရှိပြီးသား အောက်ဆီဂျင်ပေး အသက်ရှူစက် ပုံစံတွေကို များများ ထုတ်လုပ်တာက အရေးတကြီး လိုအပ်နေတဲ့ အခြေအနေနဲ့ ပိုပြီး ကိုက်ညီတယ်လို့ ဘီဘီစီကို ပြောပါတယ်။
ဒိုင်ဆင်အနေနဲ့ ပုံမှန်ကာလမှာ နောက်ဆုံး ထုတ်လုပ်ရောင်းချတဲ့ အချိန်အထိ အဆင့်ဆင့် လိုက်နာရလေ့ရှိတဲ့ စည်းကမ်းတွေ အားလုံးကို အခုလို အရေးကြီးနေတဲ့အချိန်မှာ လိုက်နာစရာ မလိုလောက်ဘူး ဆိုပေမယ့် သေသေချာချာ မလိုက်နာပဲ ထုတ်လုပ်လိုက်တာမျိုးလည်း မဖြစ်သင့်ဘူးလို့ သူက ပြောပါတယ်။
ပုံမှန်အားဖြင့်ဆိုရင် ကုမ္ပဏီတခုအတွက် အောက်စီဂျင်ပေး အသက်ရှူစက် ပုံစံတခု ထုတ်လုပ်ရောင်းချဖို့အတွက် ၂ နှစ် ၃နှစ်လောက် အချိန်ပေးရတာ ဖြစ်ပါတယ်။
ဘာပဲပြောပြော ရေရှည်မှာတော့ အောက်ဆီဂျင်ပေး အသက်ရှူစက် ပုံစံ တမျိုးမက ရှိတာက တန်ဖိုးရှိနိုင်ပါတယ်လို့ ဒေါက်တာဟာ့ရှ်က ဆိုပါတယ်။
အခြား အောက်စီဂျင်ပေး အသက်ရှူစက် ပုံစံသစ် ထုတ်မှုများ
အောက်စဖို့တက္ကသိုလ်နဲ့ လန်ဒန်ဘုရင့်ကောလိပ်တို့က အင်ဂျင်နီယာတွေ၊ မေ့ဆေးဆရာဝန်တွေနဲ့ ခွဲစိတ်ဆရာဝန်တွေကလည်း အောက်စီဂျင်ပေး အသက်ရှူစက် ပုံစံသစ် တမျိုးထုတ်ဖို့ the OxVent အဖွဲ့အနေနဲ့ ပူးပေါင်းပြီး ကြိုးစား နေကြပါတယ်။
သူတို့ထုတ်လုပ်မယ့်စက်ပုံစံသစ်က လက်ရှိထုတ်လုပ်ရောင်းချနေတဲ့ ပုံစံတွေလောက် မရှုပ်ထွေးအောင် ကြိုးစားနေကြတဲ့အတွက် ရလာရင် မြန်မြန်ထုတ်လုပ်နိုင်မယ်လို့ ဆိုပါတယ်။
ဒိုင်ဆင်ကထုတ်မယ့် စက်တွေကို အစိုးရက မှာယူထားပြီးတဲ့ အဆင့်ရောက်နေပေမယ့် the OxVent ရဲ့ စီမံကိန်းကိုတော့ အစိုးရဘက်က တခုခု အတည်ပြုချက် မပေးသေးပါဘူး။
အိစ်အန်းဂလီးယား တက္ကသိုလ်က သုတေသီတွေကတော့ 3D ပရင်တာတွေ အသုံးပြုပြီး အောက်စီဂျင်ပေး အသက်ရှူစက်တွေအတွက် အစိတ်အပိုင်းတွေသာမက နှာခေါင်းစည်းနဲ့တကွ တခြားအရေးပေါ်လိုအပ်တဲ့ ဆေးဘက်ဆိုင်ရာ ပစ္စည်းတွေကို လျင်လျင်မြန်မြန် ထုတ်လုပ်နိုင်ရေး စီမံချက် တခုကို စတင်လိုက်ပြီလို့ ကြေညာထားပါတယ်။
အောက်စီဂျင်ပေး အသက်ရှူစက် သီးသန့်ထုတ်တဲ့ ကုမ္ပဏီတွေ ဖြစ်တဲ့ ပန်လွန်နဲ့ စမစ်စ်၊ လေကြောင်းပစ္စည်း ကုမ္ပဏီ အဲဘတ်စ်နဲ့ ကားကုမ္ပဏီတွေ အဖြစ် လူသိများတဲ့ ဖို့ဒ်၊ မက်ကလာရင်နဲ့ ရိုးရွိုက်စ်တို့ စုပေါင်း ဖွဲ့စည်းထားတဲ့ The Ventilator Challenge UK ကတော့ ပန်လွန်နဲ့စမစ်စ် တို့ရဲ့ လက်ရှိထုတ်လုပ်ရောင်းချနေတဲ့ ပုံစံ နှစ်ခုကို အခြေခံမှာ ဖြစ်ပါတယ်။
ပန်လွန် ကုမ္ပဏီဟာ မေ့ဆေးပေးထားသူတွေအတွက် အောက်စီဂျင်ပေး အသက်ရှူစက်တွေထုတ်တဲ့ ကုမ္ပဏီဖြစ်ပြီး စမစ်စ်ကတော့ သယ်ဆောင်ရလွယ်ကူတဲ့ အလားတူ စက်တွေ အဓိက ထုတ်လုပ်တဲ့ ကုမ္ပဏီ ဖြစ်ပါတယ်။
စမစ်စ်ကုမ္ပဏီအနေနဲ့ လောလောဆယ် လာမယ့် ၂ ပတ် အတွင်းမှာ အောက်စီဂျင်ပေး အသက်ရှူစက် ၅၀ဝ၀ ထုတ်လုပ်ဖို့နဲ့ လပိုင်းအတွင်းမှာ သောင်းနဲ့ချီပြီး တကမ္ဘာလုံးကို ဖြန့်ချီပေးဖို့ စီစဉ်ထားတယ်လို့ မတ်လ ၂၄ ရက်နေ့က ကြေညာချက် ထုတ်ထားပြီးသား ဖြစ်ပါတယ်။
နိုင်ငံတကာမှာတော့ အောက်စီဂျင်ပေး အသက်ရှူစက်တွေ ဈေးတက်နေ
မတ်လ ၂၈ ရက်နေ့ ပေါက်ဈေးအရဆိုရင် ဒီစက်တလုံးကို အမေရိကန် ဒေါ်လာ တသိန်းနီးပါး ဖြစ်နေပြီး ပြီးခဲ့တဲ့ တပတ်ကဆိုရင် အဲဒီစက်အမျိုးအစားမျိုးပဲ အမေရိကန်ဒေါ်လာ သုံးသောင်းနီးပါးသာ ဈေးပေါက်ခဲ့တာ ဖြစ်ပါတယ်။
ဒီအသက်ရှူစက်ဈေးတွေဟာ နာရီနဲ့ အမျှကို တက်နေတဲ့ အတွက် ယူကေအစိုးရအနေနဲ့ ကြားခံကုမ္ပဏီတွေက ရောင်းချဖို့ ကမ်းလှမ်းမှုတွေကို ရှောင်ရှားပြီး ကုမ္ပဏီတွေဆီက တိုက်ရိုက်ဝယ်ဖို့ပဲ ကြိုးစားနေတယ်လို့ ဆိုပါတယ်။
အခုလို ကြားခံကုမ္ပဏီတွေဆီက ဝယ်ယူမှုကြောင့်စျေးကြီးတဲ့ ပြဿနာအပြင် အဆင့်အတန်းလည်း မမီတဲ့ ပြဿနာလည်း ကြုံရနိုင်ပြီး စပိန်မှာ ပြည်ပက ဝယ်ယူလိုက်တဲ့ ကိုရိုနာဗိုင်းရပ်စ် စမ်းသပ်ပစ္စည်းတချို့ဆိုရင် တိကျမှု နည်းတဲ့အတွက် သုံးလို့မရပဲ ဖြစ်သွားခဲ့တယ်လို့ ဆိုပါတယ်။
