ယူကေကျန်းမာရေး ဝန်ကြီးမှာ ကိုရိုနာဗိုင်းရပ်စ်တွေ့လို့ သီးသန့်ခွဲခံထားရ

ယူကေ အငယ်တန်း ကျန်းမာရေး ဝန်ကြီးလည်းဖြစ် အာဏာရ ကွန်ဆာဗေးတစ် ပါတီ အမတ်လည်းဖြစ်တဲ့ နာဒင်း ဒိုရီစ် ဟာ ကိုရိုနာ ဗိုင်းရပ်စ် ကူးစက်ခံနေရပါပြီ။

ဗိုင်းရပ်စ် ကူးစက်ခံထားရတဲ့ အတွက် အများနဲ့ ခွဲပြီး အိမ်မှာ သီးခြား ခွဲနေရတယ်လို့ မစ္စ ဒိုရီစ် က ပြောပါတယ်။

မစ္စ ဒိုရီစ်နဲ့ တွေ့ခဲ့တဲ့ လေဘာ ပါတီ အမတ် ရေချယ် မစ်ခဲလ် ကိုလည်း အလားတူ သီးသန့် တယောက်တည်း နေဖို့ ညွှန်ကြားခံထားရတယ်လို့ ဆိုပါတယ်။

မစ္စ ဒိုရီစ် ဟာ အစိုးရအဖွဲ့ အတွင်းမှာ ဗိုင်းရပ်စ် ရောဂါ လက္ခဏာ တွေ့ရတဲ့ ပထမဆုံးသူ ဖြစ်တယ်လို့ ဒီနေ့ မတ်လ ၁၁ ရက် နေ့မှာ ကျန်းမာရေး ဝန်ကြီး ဌာနက ထုတ်ပြန်ခဲ့ပါတယ်။

သူဟာ ပြီးခဲ့တဲ့ ကြာသပတေး နေ့က ဝန်ကြီးချုပ် တည်ခင်း ကျင်းပတဲ့ ပွဲကို တက်ရောက်ခဲ့ပါသေးတာ ဖြစ်ပါတယ်။

ယူကေမှာ ကိုရိုနာ ဗိုင်းရပ်စ်ကြောင့် သေဆုံးသူ ခြောက်ယောက် ရှိသွားပြီး ရောဂါပိုး တွေ့ရသူ ၃၈၂ ယောက် ရှိပါတယ်။

ဒီရောဂါပိုးကြောင့် အခုနောက်ဆုံး သေဆုံးတဲ့ အမျိုးသားဟာ အသက် ၈၀ ရှိပြီး တခြား ရောဂါ အခံရှိတယ်လို့လည်း သတင်းရရှိပါတယ်။

တချိန်တည်းမှာ အသက် ၅၃ နှစ် အရွယ် ဗြိတိန်က အမျိုးသမီးဟာ ကိုရိုနာ ဗိုင်းရပ်စ်ကြောင့် အင်ဒိုနီးရှားမှာ သေဆုံးသွားခဲ့ပြီး သူဟာ ကိုဗစ် နိုင်တင်းနဲ့ ပထမဆုံးအင်ဒိုနီးရှားမှာ သေဆုံးသူ ဖြစ်တယ်လို့ ဒေသန္တရ သတင်းတွေမှာ ဖော်ပြထားပါတယ်။

ဒီအမျိုးသမီးမှာ တခြား ရောဂါ အခံ ရှိသလား ၊ ဒါမှမဟုတ် ကိုရိုနာဗိုင်းရပ်စ် ပိုးကြောင့်ဘဲ သေဆုံးတာလား ဆိုတာကိုတော့ ကွဲကွဲပြားပြား မသိရသေးပါဘူး။

အင်ဒိုနီးရှားမှာ သေဆုံးသွားတဲ့ ဗြိတိသျှ အမျိုးသမီးရဲ့ မိသားစု ၊ အင်ဒိုနီးရှားက ဒေသန္တရ အာဏာပိုင် တွေနဲ့ ဆက်သွယ်ပြီး ကူညီဆောင်ရွက်ပေးနေပါတယ်လို့ ပြည်ပ အရေးနဲ့ ဓနသဟာရ နိုင်ငံများဆိုင်ရာ ရုံးက ထုတ်ပြန် ခဲ့ပါတယ်။